Një nga Klinikat kryesore të QKUK-së para kolapsi, sepse Arben Vitia refuzon të hap konkurs për pranimin e 4 specialistëve të kirurgjisë vaskulare

Nëse në klinikën e Kirurgjisë Vaskulare të QKUK-së do të punësoheshin vetëm katër specialistë, më nuk do të kishte listë të pritjes prej 3.5 vjetësh e nuk do të duhej të dërgoheshin afër 40 veta jashtë Kosovës për shërim që kushton mbi 1 milion euro.

Punësimi i katër mjekëve do të ishte një zgjidhje e menjëhershme, efikase dhe jo e kushtueshme, por Ministria e Shëndetësisë po refuzon – për arsye që askush nuk i bënë të qarta – që t’i punësojë këta katër profesionistë.

Këtë nevojë urgjente e ka prezantuar për herë të fundit para organeve me 6 maj 2023 edhe Drejtori i Klinikës së Kirurgjisë Vaskulare, Hajriz Rudari, por nuk i është përgjigjur askush pozitivisht, derisa specialistët që nevojitën në klinikë po mbesin në pritje pa punë, me rrezikun që të largohen nga Kosova e të punësohen në ndonjë vende të Perëndimit.

Drejtori Rudari në letrën e tij, drejtuar drejtorit të përgjithshëm të Shërbimit Spitalor Klinik Universitar të Kosovës (ShSKUK), Elvir Azizi, kryetarit të bordit të ShSKUK-së, Naim Bardiqi e po ashtu ministrit të Shëndetësisë, Arben Vitia, argumenton në detaje nevojën për ndihmën e specialistëve të rinj dhe ua shpalosë domosdoshmërinë e veprimit, por gjithçka ka ngelur në përpjekje të dëshpëruar.

“Kërkoj nga ju që të bëni hapjen e konkursit për punësimin e katër specialistëve të ri, kirurgë vaskularë të cilët aktualisht janë pa punë”, ka shkruar në letër drejtori i Klinikës Rudari, të cilën e ka siguruar Albanian Post.

“Fjala është për kolegë që kanë marrë titullin e specialistit brenda një periudhe më të gjatë se një vjet. Punësimi është kyç për rritjen e perfomancës së Klinikës, përfshirë zvogëlimin e listës së pritjes dhe ngritjen e kapaciteteve në kirurgji endovaskulare”, thuhet në kërkesën e drejtorit.

Kjo nuk ishte kërkesa e parë. Edhe në të kaluarën – për shkak të situatës që po rëndohet – Rudari vazhdimisht ka dërguar letra të tilla të shpalosjes së urgjencës.

“Nevojën për punësime të reja e kemi ngritur disa herë në të kaluarën”, u drejtohet Rudari institucioneve.

Përveç situatës aktuale ai ua prezanton një skenarë akoma më të errët për të ardhmen, nëse specialistët e rinj nuk pranohen urgjentisht.

“Në pesë vitet e ardhshme dy do të pensionohen, ndërsa në 10 vjetet e ardhshme edhe 4 kirurgë të tjerë do të pensionohen”, tregon Rudari çka shpalosë se nëse këta që janë aktualisht të papunë vendosin të largohen nga Kosova meqë nuk po punësohen dhe të tjerët dalin në pension, atëherë klinika do të duhej të mbyllej fare në pamunësi për të operuar.

Klinika e Kirurgjisë Vaskulare të QKUK-së është një nga klinikat më të rëndësishme, sepse është e vetmja në Kosovë ku mjekohen patologjitë e sistemit vaskular, përfshirë të arterieve dhe venave, shputa diabetike dhe formimi i fistulave për dializë”.

Rudari ia vizaton ministrisë këtë situatë para kolapsi.

“Klinika e Kirurgjisë vaskulare ka 13 mjekë specialistë, 6 prej të cilëve janë mbi moshën 55 vjet. Në Klinikë është vetëm një specializant i kirurgjisë vaskulare. Numri i pacientëve të shtrirë në Klinikën e Kirurgjisë Vaskulare në vitin e kaluar ka qenë 1405 pacientë, ndërsa numri i ditëve të shërimit 6326 ditë”, sqaron letra, drejtuar ministrisë dhe institucioneve të tjera.

“Numri i operacioneve të realizuar në Klinikën e Kirurgjisë Vaskulare në vitin 2022 ka qenë 1202 operacione. Në këtë numër nuk janë përfshirë intervenimet e vogla si sklerotizimet e venave, flebektomiete, ekscizionet e malformacioneve, nekretktomite dhe ngjashëm të cilat realizohen në mënyrë ambulantore në Ambulancat Specialistike të QKUK”.

Drejtori në letër sqaron gjithashtu se, “Klinika ka një liste të madhe të pritjes për operacione të venave varikoze në të cilën janë 1890 pacientë”.

“Në klinikë kujdestarojnë 10 kirurgë vaskular që e bën organizimin e kujdestarisë problematike, duke qenë se në ekipe nga dy, kjo d.m.th se kujdestarojnë çdo të gjashtën ditë. Organizimi i tillë vazhdimisht krijon probleme në organizimin e punës në klinikë duke qenë se këto ekipe në ditën e ardhshme pas kujdestarisë janë të lirë”.

“Klinikës i është aprovuar projekti i sallës hibride (kirurgji vaskulare/endovaskulare i cili në mes tjerash kërkon kuadro shtesë” , ishin këto arysetimet e drejtorit Rudari për nevojën urgjente të punësimit për specialistë të rinj.

Albanian Post ka kontaktuar drejtorin e ShSKUK-së, Elvir Azizi.

I pyetur përse nuk punësohen specialistët kur nevoja është kaq e madhe, ai s’pati përgjigje vetë, duke adresuar pyetjen për tek Zyra për Media.

Nga kjo zyrë është kthyer një përgjigje e çuditshme.

Specialistët s’po punësohen, por kërkesa s’është refuzuar, thonë nga ShSKUK-ja.

“Lidhur me kërkesën e kirurgëve vaskularë, ju bëjmë me dije ajo nuk është refuzuar, por jemi në fazën e përgatitjes së planit të përgjithshëm për resurse humane për klinikat e QKUK-së”, thuhet në përgjigje.

Kjo fazë e përgatitjes po zgjatë tash e 2 vjet. Prejse grupi i specializantëve ka përfunduar provimin final në shkurt të vitit 2022 ata është dashur të largohen për shkak të mos themelimit të kontratave nga ministria.

Gjendur nën presionin e pyetjeve, megjithatë nga ShSKUK kanë dhënë një datë kur mendojnë të japin një zgjidhje finale.

“Pritet të përfundojë deri me datë 15 shkurt 2024”, thanë nga ky institucion.

Albanian Post ka pyetur edhe në Ministrinë e Shëndetësisë se përse nuk hapet konkurs, kur situata është kaq urgjente, nevoja është kaq e madhe dhe specialistët janë aty duke pritur për t’u punësuar.

Krejt çka duhet është buxhet për katër paga më shumë për ta shpëtuar një nga klinikat më të rëndësishme në QKUK.

Por, nga ministria kanë refuzuar të japin përgjigje.

“Menaxhimi i stafit në klinikat e QKUK-së bëhet nga vetë ShSKUK, prandaj, ju lusim që pyetjet e juaja t’i adresoni të ky shërbim për përgjigje”, na është thënë nga MSH me shkrim, duke refuzuar të marrin përgjegjësi për situatën.

Të pyetur sërish nga Albanian Post se përse nuk veprojnë për të nxjerr klinikën nga gjendja ekzistuese, kur buxhet të mjaftueshëm ka, e dinë për mungesën e stafit, listat e pritjes dhe shpenzimet enorme që bëhen për t’i dërguar rastet në vende të tjera, prapë s’ka pasur përgjigje.

Në gjithë hallkën e institucioneve që merren me punësime në QKUK, i rëndësishëm është edhe bordi i ShSKUK-së, që udhëhiqet nga nënsekretarin i MSH-së, Naim Bardiqi.

Edhe Bardiqi është përgjigjur vetëm me heshtje. Ka refuzuar të flas për rastin.

Një person që e di mirë situatën është edhe ish-ministri i Shëndetësisë, Armend Zemaj.

Zemaj, sa ishte ministër i Shëndetësisë, kishte punësuar të gjithë specialistët që ishin të papunë në kohën kur mori mandatin.

Kjo edhe për arsye të urgjencës me pandeminë.

Jo të gjithëve që ua mundësoi punësimin Zemaj u është vazhduar kontrata edhe pas ndërrimit të qeverive.

“Qe tre vjet janë larguar nga QKUK-ja me dhjetëra dhe kanë kaluar në privat, e mos të flasim sa në numër kanë ikur jashtë vendit”, ka thënë Zemaj në një përgjigje me shkrim për Albanian Post.

Nga këndvështrimi i ish-ministrit ai thotë se nevoja për specialistë në klinikat e QKUK-së është emergjencë dhe jo dëshirë.

Prandaj, për të është e pakuptueshme se përse specialistët e rinj nuk po punësohen.

“Është e tmerrshme humbja e mundësisë që specialistët të mos punësohen kur dihen nevojat për staf, po ashtu edhe për motivim të mbajtjes së kuadrove deficitare që mos të lëshojnë Kosovën, por edhe institucionet publike shëndetësore”.

Zemaj, që është kundërshtar politik i ministrit Vitia thotë se arsye e mos punësimeve në raste si ky në Klinikën e Kirurgjisë Vaskulare është paaftësia e qeverisë dhe asgjë tjetër.

“Kjo paaftësi jo që e ka dëmtuar sektorin e shëndetësisë në tërësi, por është shndërruar në mekanizëm i cili është bërë shkaktar edhe i largimit masiv të mjekëve dhe infermierëve jashtë vendit”.

Në njërën anë deklarohet se ka rritje të buxhetit, ndërsa në anën tjetër s’ka asnjë specialist të ri që është punësuar, thotë Zemaj.

Për një vit në Fakultetin e Mjekësisë në Universitetin e Prishtinës “Hasan Prishtina”, diplomojnë rreth 150 mjekë të rinj.

Për shkak të kushteve të rënda dhe keqmenaxhimit, kuadri specialistik mjekësor, po vazhdon të ikë nga Kosova me qëllim për të kërkuar punë në vende të ndryshme të botës.

Problemi i ikjes së mjekëve nga Kosova, ka filluar që në vitin 2016 kur qeveria ndaloi së hapuri konkurset për specializantë.

Ndërsa, profesionistë shëndetësorë tashmë kanë deklaruar se për këtë dukuri duhet të ndërmerren masa urgjente, në mënyrë që të zvogëlohet numri i ikjes së mjekëve nga Kosova.

Planet qeveritare, sipas asaj që është prezantuar deri më tani, janë dhënë kryesisht si platforma të përgjithshme, ku nuk flitet për probleme specifike të shëndetësisë.

Dhe derisa qeveritarët ndërrohen, ikja e mjekëve të rinj mbanë ritmin e njëjtë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com