Një muze në Holandë ndryshon emrin për shkak të koleksionit rus

Një muze në Amsterdam ka ndërprerë lidhjet me koleksionin Hermitage të Shën Petersburgut pas pushtimit të Ukrainës nga Moska vitin e kaluar.

Ai është riemërtuar dhe të hënën njoftoi partneritet me galeri të njohura në Londër, Paris dhe Washington D.C.

Lajmi u bë i ditur nga agjencia amerikane “Associated Press”.

Duke filluar nga shtatori, Hermitage Amsterdam do të quhet Muzeu H’ART.

Ajo ka krijuar partneritete me Muzeun Britanik, Qendrën Pompidou dhe Muzeun Amerikan të Artit Smithsonian për të sjellë artin në ndërtesën historike në brigjet e lumit Amstel të kryeqytetit holandez.

“Është një hap i ri emocionues për ne, një model bashkëkohor dhe i dëshmuar për të ardhmen”, tha drejtoresha e muzeut Annabelle Birnie në një deklaratë.

Ajo tha se programi i muzeut do të jetë “me shumë zëra duke reflektuar kohën në të cilën jetojmë” dhe do të variojë nga ekspozitat e mëdha të artit deri te prezantimet më të vogla.

Shfaqja e parë e madhe – e planifikuar të hapet në mes të vitit 2024 – do të jetë një partneritet me Qendrën e Parisit Pompidou, e fokusuar në Wassily Kandinsky, artistin me origjinë ruse që u bë shtetas francez dhe vdiq në Francë në 1944.

Muzeu u hap fillimisht në vitin 2009 dhe u mbështet gjerësisht në koleksionin e madh të artit të Hermitage në Shën Petersburg për të organizuar ekspozita.

Megjithatë, vitin e kaluar ajo i dha fund marrëdhënies, duke thënë: “Me pushtimin e ushtrisë ruse në Ukrainë, një kufi është kaluar. Lufta shkatërron gjithçka”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.