Një i vdekur, 21 të lënduar – Krejt çka dihet për rastin në “Bon Vivant”

Një i vdekur, 21 të lënduar, 14 prej tyre vajza, katër të dyshuar të hospitalizuar në QKUK, është bilanci tragjik i ngjarjes që ndodhi në orët e vona të së premtes në një nga lokalet më të famshme të kryeqytetit “Bon Vivant”, ku pati të shtëna me armë zjarri dhe përplasje fizike.

I vdekuri si pasojë e kësaj ngjarje është një mashkull i moshës 39 vjeçare.

Lajmin për Albanian Post e konfirmoi Shefi i repartit intensiv në QKUK, Shaqir Uka.

“Po, ka vdekur një prej personave të plagosur mbrëmë, një 39-vjeçar. Ai ishte nën kujdesin intensiv kishte intervenik kirurgjik por për shkak të lëndimeve të mëdha, fatkeqësisht ka vdekur në orët e hershme të mëngjesit të sotëm”, ka thënë Uka për AP.

Ndërsa, Policia e Kosovës në raportin 24 orësh të së shtunës, bëri me dije se nga rasti i orëve të vona të së premtes, 21 persona kanë mbetur të lënduar, 4 prej tyre kanë mbetur të lënduar pas të shtënave me armë zjarri, ndërsa 17 të tjerë si pasojë e thyerjeve të gotave të qelqit.

Policia njoftoi se i gjithë ngjarja ka ndodhur për shkak të një mosmarrëveshje, duke mos dhënë detaje shtesë.

“Dyshohet se pas një mosmarrëveshje në një lokal, në mes të disa të  dyshuarve meshkuj kosovarë, janë përdorur edhe armë zjarri  (të shtëna me armë zjarri), si pasojë e kësaj lëndime trupore kanë pësuar katër të dyshuar meshkuj kosovarë (nga arma e zjarrit), ndërsa si pasojë e thyerjeve të gotave–shisheve të qelqit lëndime kanë pësuar 17 persona, prej tyre tre meshkuj dhe 14 femra”, thuhet në raportin 24 orësh të policisë.

Ndërkaq, nga policia bënë me dije se “katër të dyshuarit mbeten të hospitalizuar në QKUK dhe me vendim të prokurorit ndalohen (nën përkujdesje të policisë)”.

“Në vendin e ngjarjes kanë dalë njësit relevante policore dhe njësia  K-9, në vend-ngjarje janë gjetur katër gëzhoja dhe njolla gjaku. Një i dyshuar mashkull gjendet në arrati”.

Për rastin, pas mesnatës ka folur edhe Drejtori i Klinikës Emergjente, Naser Syla, i cila kishte treguar edhe gjendjen e të lënduarve.

“Krejt i kemi 17 të lënduar. 7 janë me armë zjarri kurse 10 janë me lëndime të tjera, me xhama ose mjete të tupitura. Të gjithë janë në gjendje stabile, ndërsa njëri është në sallë të operacioni dhe është në rrezik për jetë”, ka deklaruar Syla pasmesnatës.

Ndërkaq, ai shtonte se “prej këtyre gjashtë të tjerëve, një nga ta pret që të hyjë në sallën e operimit, por gjendja e tyre është stabile”.

“Mosha e pacientëve sillet prej vitit 1984 deri në 2003”, potencoi Syla.

Në të njëjtin lokalë, në vitin 2014 kishte mbetur i vdekur një person.

Atëherë kishte mbetur i vdekur roja i lokalit.

Për rastin janë dënuar dy persona, Masar Gërdovci dhe Sherif Krasniqi.

Gërdovci, në rigjykim është dënuar me 18 vjet burgim për vrasje dhe 1500 euro gjobë për armëmbajtje pa leje, ndërsa Sherif Krasniqi për vrasje në bashkëkryerje është dënuar me 6 vjet burgim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.