Kancelari gjerman Olaf Scholz është shprehur edhe një herë në favor të zgjerimit të Bashkimit Evropian.
Scholz e konfirmoi qëndrimin e tij në një takim të socialdemokratëve evropianë, duke iu referuar gazetës gjermane “Tagesschau”.
Një BE e zgjeruar do të jetë në gjendje të ndikojë më mirë në çështjet botërore, beson Scholz.
“BE, e cila përfshin 27, 30, 36 shtete, si dhe më shumë se 500 milionë qytetarë të lirë dhe të barabartë, mund të forcojë ndikimin e saj në botë edhe më shumë”, tha Scholz.
Aktualisht, Bashkimi Evropian përbëhet nga 27 anëtarë.
“Unë jam i përkushtuar për zgjerimin e BE. Zgjerimi i mëtejshëm i BE-së në lindje është një fitore për të gjithë ne”, tha ai.
Që nga marrja e detyrës, Scholz e ka bërë zgjerimin e Bashkimit Evropian një nga drejtimet kryesore të politikës së tij të jashtme.
Ajo u bë edhe më e rëndësishme pas pushtimit të Ukrainës nga Rusia, e cila në fillim të verës u bë kandidate për anëtarësim në BE.
Në të njëjtën kohë, kancelari gjerman është i bindur se kandidatët për anëtarësim, si Ukraina, Moldavia, vendet e Ballkanit Perëndimor dhe në të ardhmen Gjeorgjia, duhet të përmbushin kriteret e anëtarësimit.
Me zgjerimin e BE-së nuk duhet të anashkalohen problemet e shteteve më të vogla anëtare, është i bindur Scholz.
“Gjithashtu, në të ardhmen çdo vend duhet të dëgjohet me problemet e tij, çdo gjë tjetër do të ishte tradhti ndaj idesë evropiane”, shtoi ai.
Scholz bëri thirrje gjithashtu për reforma brenda vetë BE-së.
Kancelari beson se për të shmangur ngërçet, duhet të ketë një kalim gradual në miratimin e vendimeve me shumicë votash në politikën e jashtme dhe financiare dhe jo me konsensus, siç është sot.
Scholz gjithashtu premtoi të mbështesë Ukrainën në rezistimin e luftës së agresionit të Rusisë.
“Pushtimi brutal i Rusisë është një sulm ndaj rendit evropian të sigurisë”, beson kancelari gjerman.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
