DNV: S’vërehet interes nga qytetarët për të marrë pjesë në procesin e votimit në Veri

Organizata “Demokracia në Veprim” e cila përmes ekipeve mobile po vëzhgon procesin e votimit për ose kundër largimit të kryetarëve të katër komunave veriore të vendit – Mitrovicë e Veriut, Leposaviq, Zveçan dhe Zubin Potok, ka njoftuar se procesi i votimit deri në orën 09:00 është i qetë dhe se nuk vërehet interes nga qytetarët për të votuar.

“Sa i përket administrimit të procesit, KQZ është vonuar me informim për qytetarët lidhur me vendndodhjen e qendrave të votimit, meqë ky vendim është marrë vetëm një ditë para procesit të votimit. Gjatë vizitave të vëzhguesve nëpër Qendra të Votimit është vërejtur se disa prej tyre nuk mundësojnë qasje për persona me aftësi të kufizuar dhe për persona që janë në moshë të shtyrë”, thuhet në njoftim.

Sipas njoftimit, votimi brenda disa qendrave të votimit është aranzhuar për disa vendvotime në një hapësirë të përbashkët sipas modelit të hapur.

“Po ashtu është vërejtur se në të gjitha vendvotimet ka të vendosura kamera të sigurisë, ndërkohë që kabinat e votimit janë të vendosura në pozicionin që mund ta cenojnë fshehtësinë e votës dhe mund të shihen si intimidim nga votuesit”.

“Instruksionet për vendosjen kabinave të votimit në këtë mënyrë janë përfshirë në udhëzuesit që KQZ ka përgatitur. Kjo është hera e parë që qytetarët do të votojnë nën survejimin e kamerave. Demokracia në Veprim do t’ju mbajë të informuara gjatë ditës për ecurinë e procesit”.

Nën vëzhgimin e kamerave nis votimi në katër komunat veriore

Vendvotimet janë të hapura nga ora 07:00 deri në orën 19:00, ndërkaq për t’i shkarkuar kryetarët duhet votuar 50 për qind plus një votues, që procesi të rezultojë i suksesshëm dhe të mbahen zgjedhje të jashtëzakonshme.

Në konferencën e parë për media këtë të diele, zëdhënësi i Komisionit Qendror të Zgjedhjeve, Valmir Elezi, tha se janë hapur të gjitha qendrat e votimit më kohë.

“Duke u mbështetur në të dhënat që kemi pranuar nga Komisionet Komunale të Zgjedhjeve, ju njoftojmë se janë hapur të gjitha qendrat e votimit”, theksoi Elezi.

Në emër të KQZ-së, Elezi ftoi të gjithë qytetarët që ta shfrytëzojnë këtë të drejtë të tyre për të marrë pjesë në procesin e votimit.

Ndryshe, në qendrat e votimit në katër komunat veriore ku po mbahen votimet për ose kundër largimit të kryetarëve shqiptarë janë vendosur kamerat.

Megjithatë Lista Serbe – partia më e madhe e serbëve të Kosovës – njoftoi javë më parë se nuk do të marrë pjesë në votimin për shkarkimin e kryetarëve shqiptarë.

Sipas Listës Serbe kjo mospjesëmarrje vije meqë në vlerësimin e tyre janë vendosur “procedura të parealizueshme” për votimin e 21 prillit dhe se listat e votuesve “nuk e pasqyrojnë gjendjen reale në terren” dhe se numri i shqiptarëve në listat e votuesve “është rritur”.

Në katër komunat veriore, të drejtë vote kanë 46.556 persona, apo 1.461 votues më shumë krahasuar me zgjedhjet lokale të mbajtura më 23 prill 2023, kur u zgjodhën kryetarët shqiptarë.

Kryetarët shqiptarë u zgjodhën në prill të vitit 2023 në zgjedhjet të cilat u bojkotuan nga serbët në shenjë pakënaqësie me politikat e Qeverisë së Kosovës.

Ndërkaq tensionet u ngritën pasi kryetarët shqiptarë, me ndihmën e policisë hynë në ndërtesat komunale në Mitrovicën e Veriut, Zveçan, Leposaviq dhe Zubin Potok, në maj të vitit të kaluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.