Nikolla Sanduloviç lirohet nga paraburgimi

Politikani opozitar serb, Nikolla Sanduloviç, është liruar të hënën nga paraburgimi në qytetin jugor të Serbisë, Nish.

Lajmin e ka bërë të ditur avokati i tij mbrojtës, Çedomir Stojkoviç, duke sqaruar se ky vendim u mor “pas trysnisë së shtuar” nga vendet e Perëndimit.

“Nikola Sanduloviq sapo është liruar për ta mbrojtur veten nga akuzat se kishte vendosur lule pranë varrit të një vajze shqiptare”, ka shkruar ai në rrjetin social X.

Sanduloviç, bëri homazhe më 2 janar në kompleksin “Adem Jashari”, në Prekaz duke vendosur një kurorë në monumentin që përkujton ngjarjet e 5, 6 dhe 7 Marsit 1998, kur forcat serbe vranë mbi 50 anëtarë të familjes së Adem Jasharit, një nga themeluesit e ish-Ushtrisë Çlirimtare të Kosovës (UÇK).

“Unë jam i vetmi politikan nga Serbia që kam ardhur për të nderuar viktimat e pafajshme shqiptare, familjen Jashari në Prekaz. Unë kërkova falje dhe kërkova falje në emër të serbëve që nuk e bënë këtë”, kishte shkruar ai.

Politikani serb bën homazhe në Prekaz: Kërkova falje në emër të serbëve për viktimat e pafajshme shqiptare gjatë luftës

Një ditë pas kësaj video, avokati i tij, Çedomir Stojkoviç, bëri të ditur se Sanduloviçi është arrestuar më 3 janar dhe se familja e tij nuk ka asnjë informacion për vendndodhjen e tij.

Po në këtë ditë, Stojkoviç deklaroi se ishte bastisur banesa e tij në komunën e Beogradit “Savski venac”.

Duke vepruar kështu, ai ndau një foto të urdhrit të bastisjes të lëshuar nga Gjykata e Lartë Publike në Beograd. Sipas Stojkoviç, Sanduloviç është transferuar në burg ani pse “jeta e tij është në rrezik”.

Në bazë informacioneve të fundit nga familja dhe bashkëpunëtorët e afërt, politikani opozitar serb është kthyer në gjendje shumë të keqe nga spitali të enjten pasdite, ku ka qenë duke marrë trajtim mjekësor intensiv.

Ai dyshohej se ishte paralizuar, megjithëse s’kishte asnjë njoftim zyrtar për rastin.

Shqetësim në Kosovë për gjendjen e Sanduloviç-it, heshtje në Serbi

Kush është Sanduloviç?  

Nikolla Sanduloviç, është kryetar i Partisë Republikane, parti e cila që nga themelimi në vitin 2015, nuk e ka kaluar pragun zgjedhor.

Në jetën politike të Serbisë, ai u shoqërua me polemika, kryesisht në lidhje me akuzat për përhapjen e lajmeve problematike, të cilat kulmuan gjatë pandemisë.

Megjithatë, ngjarja më e rëndë që lidhet me emrin e tij është nga janari i vitit 2010, kur ai u plagos në shpërthimin e një bombe të vendosur nën makinën e tij në Beograd.

Rasti është ende i pazbardhur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.