Nga të gjitha komunat në Kosovë, vetëm dy nga komunitetet do kenë kryetare gra

Në garën për zgjedhjet lokale udhëheqja e komunave u është besuar vetëm dy grave. Kjo, për arsye se siç konsiderohet, përfshirja e tyre në pozita politike mbetet në kuota të ulëta dhe se partitë politike nuk e kanë prioritet barazinë gjinore.

Nga gjithsejtë 14 gra dhe 152 burra kandidatë për kryetarë të komunave, vetëm dy gra prej tyre arritën të marrin postin e kryetares së komunës ku do të udhëheqin për katër vjetët e ardhme. Ljiljana Shubariç dhe Katarina Ristiç janë dy gratë e vetme që do të udhëheqin komunën e Graçanicës, dhe atë të Ranillugut.

Luljeta Demolli – Drejtoreshë ekzekutive në Qendrën Kosovare për Studime Gjinore, për Albanian Post thotë se partitë politike nuk e kanë prioritet barazinë gjinore.

Siç thekson ajo, vendimmarrja në partitë politike është e burrave prandaj gratë në nivelin lokal “nuk kanë mundur të depërtojnë për arsye të partive, sepse partitë politike janë jo demokratike”.

“Edhe kësaj here u dëshmua se barazia gjinore nuk shihet si vlerë në nivelin lokal. Për këtë gjë fajin 100 për qind e kanë partitë politike dhe askush tjetër, pasi nuk kanë kandiduar numër të barabartë të grave dhe burrave”, është shprehur ajo.

Sipas saj, partitë politike në Kosovë janë “patriarkale”.

“Ka pasur gra me potencial të mirë që kanë kandiduar por siç duket kanë kandiduar ose me vonesë ose nuk janë përkrahur mjaftueshëm ose janë dërguar në vendet ku veç ka ekzistuar një perceptim dhe disponim i qytetarëve për një kandidat”, shtoi ajo.

“Partitë politike nuk e shohin ende si vlerë barazinë gjinore, prandaj është faji te ato sepse popullata e ka dëshmuar, ka votuar për gruan në Kosovë, për Vjosa Osmanin si presidente”.

Sipas analistit Shemsi Jashari, ani pse Kosova ka treguar se pajtohet me udhëheqjen e grave pasi tashmë ka gruan e dytë femër si presidente, për të “përfshirja e grave në pozita politike mbetet në kuota të ulëta dhe kjo duhet të ndryshojë”.

Siç deklaroi Jashari, numri i vogël i grave që arrijnë të kenë sukses në politikë në nivelin lokal vjen si pasojë e disa faktorëve.

“Mbështetja e vogël, tradita, interesimi i vogël i grave të jenë aktive në periudha të gjata, mosbesimi i strukturave, mbështetja financiare e të tjera”, janë disa prej tyre ka thënë Jashari.

Pak gra edhe në kuvendet komunale

Komisioni Qendror i Zgjedhjeve, për zgjedhjet lokale të 17 tetorit, ka certifikuar pesë mijë e 198 kandidatë për kuvende komunale – prej tyre, tre mijë e 261 ishin bura, kurse një mijë e 937 ishin gra.

Numri i ulëseve në 38 kuvendet komunale është një mijë e 002 dhe nga ky numër, 358 janë zgjedhur gra.

Ligjërisht, partitë politike janë të obliguara që të kenë së paku 30 për qind gra në lista zgjedhore.

Blerina Ukshini nga organizata jo-qeveritare Demokracia për Zhvillim, për AP ka thënë se derisa numri i ulët është pasqyrë e asaj që partitë politike ende nuk e kanë besimin të vendosin kandidate për kryetare në komuna, pritet që tashmë këto parti të emërojnë më shumë gra në pozitat e drejtoreve.

“Partitë politike duhet të emërojnë më shumë gra në pozitat e drejtoreve dhe kryesueseve të kuvendeve komunale dhe gjithashtu edhe nënkryetareve meqë në vitin e kaluar e kemi pasur vetëm një nënkryetare të komunës”, u shpreh Ukshini.

Kjo për shkak se siç potencoi ajo, në krahasim me zgjedhjet e kaluara, “ka ngritje sa i përket kandidaturës po ashtu edhe të zgjedhjes së grave kandidate mirëpo sa i përket asamblesë në disa komuna kemi rënie të përfaqësimit të grave në asamble komunale”.

Ndërkohë, nga zgjedhjet lokale të tetorit, Shubariç dhe Ristiç, që vijnë nga partia politike Lista Serbe, janë zgjedhur kryetare në rundin e parë të zgjedhjeve lokale në Kosovë, që është mbajtur më 17 tetor.

Katarina Ristiç, arriti të marrë dy mijë e 427 vota apo 100 për qind të votave të përgjithshme.

Ndërsa, Ljiljana Shubariç, arriti të grumbullojë gjashtë mijë e 506 vota apo 77.93 për qind.

Megjithatë, këto nuk ishin të vetmet gra që iu futën garës për në krye të komunave.

Në komunat e tjera në balotazh ka arritur të shkojë vetëm kandidatja e Lëvizjes Vetëvendosje për kryetare të Gjakovës, Mimoza Kusari Lila, e cila në rundin e parë përballë kandidatit nga Aleanca për Ardhmërinë e Kosovës, Ardian Gjini, ka marrë 37.20 për qind të votave.

Kurse, në rundin e dytë mori 43.94 për qind të votave, që ishin të pamjaftueshme për t’u zgjedhur në krye të Gjakovës.

Kandidate grua pati edhe në komunën e Ferizajt.

Sibel Halimi, nga Lidhja Demokratike e Kosovës, në rundin e parë mori 9.34 për qind duke mos arritur të shkojë në raundin e dytë.

I njëjti fat e përcolli edhe Floretë Zejnullahun, nga Partia Demokratike e Kosovës e cila garoi për kryetare të Podujevës dhe mori 6.45 për qind të votave.

Ky subjekt politik, kandidate pati edhe në Gjilan. Leonora Morina-Bunjaku, fitoi vetëm 8.25 për qind të votave të përgjithshme.

As kandidatet e LDK-së dhe AAK-së që garuan për kryetare të Drenasit nuk arritën të bëhen të parat e komunës.

Po ashtu, Arta Ahmeti-Xhylani, nga AAK mori 1.79 për qind ndërsa Anduena Gllareva, nga LDK-ja arriti të marrë veç 0.96 për qind të votave.

Edhe në komunën e Pejës pati një kandidate për këtë komunë. Drena Podrimçaku, nga Partia Balliste mori vetëm 0.23 për qind të votave.

Po ashtu, komuna e Deçanit, pati dy gra kandidate, por që asnjëra nga to nuk arriti të korrte sukses në asnjërin raund të zgjedhjeve.

Por, fati nuk i priu as Ardiana Qorrajt, nga Partia Demokratike e Kosovës që mori 1.96 për qind të votave.

Ndërkaq, Kaltrina Salihu, kandidoi për të marrë pozitën e kryetares së Dragashit por nuk i mjaftuan votat e marra në rundin e parë. Ajo mori 17.34 për qind.

Dhe, kandidatja e pavarur në Zveçan, Sladjana Pantoviç, nuk mori më shumë se 1,57 për qind të votave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.