Nga sot gjobat e Policisë Rrugore do t’u njoftohen qytetarëve në telefon

Përmes sistemit e-gjoba, çdo drejtues mjeti që kryen një shkelje rrugore dhe ndëshkohet nga shërbimi policor, do të njoftohet përmes një mesazhi apo emaili.

Kështu, çdo drejtues do të kenë mundësinë të shlyejë detyrimin në kohë dhe të përfitojë nga ulja e masës së gjobës 50 për qind kur e paguan brenda 15 ditëve.

Ministri i Brendshëm Taulant Balla dhe Drejtori i Përgjithshëm i Policisë së Shtetit prezantuan sistemin, pjesë e paketës së risive digjitale.

“Do të duhet që kundrejt konfirmimit të vetë qytetarit të adresës së emalit dhe numrit të telefonit, brenda 7 deri në 10 minuta të marrin njoftimin për masën administrative”, ka treguar drejtori i PSH, Muhamet Rrumbullaku.

Sipas tij, nëpërmjet saj shmangen abuzimet, pasi ka shumë ankesa nga qytetarë që interesohen për gjobat, duke pretenduar se është jo e drejtë, se nuk kanë qenë në atë aks rrugor, apo atë parkim.

“Ky është momenti për t’i bërë thirrje çdo qytetari që nëse do të njoftohet për marrjen e penalitetit të shkeljes rrugore, mund të logohet në e-Albania dhe në momentin që kryen një shkelje rrugore mesazhi i vjen në telefon”, ka apeluar Balla.

Drejtori i Policisë Rrugore Altin Qato shpjegoi se kështu zgjidhet dhe një nga shqetësimet e shumta të qytetarëve, pasi me ndryshimet e fundit në Kodin Rrugor, nëse pagesa e gjobës bëhet brenda 15 ditëve, shkelësi përfiton 50 për qind ulje të gjobës.

Sakaq, nisma u prezantua pranë shkollës së mesme “Ismail Qemali” në kryeqytet.

“Këtu kemi një nga shkollat më të mëdha të Tiranës, e në kuadër të masave të reja, të Paketës së Sigurisë në Shkolla, e kjo rrugë bën pjesë e perimetrit të sigurisë, sepse është trotuari dhe rruga ngjitur me oborrin e shkollës, që do të thotë se na duhet të rritim prezencën policore”, ka thënë kreu i Ministrisë së Brendshme.

Ai shpreson që shumë shpejt me Bashkinë Tiranë me vendosjen e kamerave të sigurisë dhe ato që regjistrojnë shpejtësinë e mjeteve, aksesojnë sistemin dhe çojnë gjobën te Salla e Komandimit dhe plotësohet masa administrative e njoftohet qytetari.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.