Nga pushime, në ferr – Si u përgjak Himara nga efektivi i Policisë?

Ata ishin me origjinë nga Tropoja, por prej vitesh jetonin në Kanada. Vajza 7-vjeçare pati lindur atje dhe pushimet e këtij vitit, kishin vendosur t’i kalonin në Himarë.

Ndoshta gjithçka do të mbetej një kujtim i bukur, po të mos ishte për tragjedinë që e goditi familjen Avdia, kur të tre pjesëtarët e saj, u goditën nga një mjet lundrues, i cili doli në breg të detit.

Prindërit, dikush më lehtë e dikush më rëndë, mbetën të plagosur. E mitura – me flokë të arta siç e përshkruajnë dëshmitarët e horrorit në bregdet – mbeti e vdekur në vend.

E gjithë kjo, nga dora e një efektivi të Policisë së Shtetit, i cili ushtronte detyrën e shefit të Seksionit të Policimit në Komuniteti pranë Komisariatit të Policisë Elbasan.

Arian Tase, nga një funksionar publik, ishte kthyer në personin, i cili i mori jetën një vajze 7-vjeçare në rivierën shqiptare.

Nga pakujdesia apo tjetër gjë, kjo mbetet për t’u hetuar nga organet kompetente.

E sigurt është se ai u arrestua menjëherë dhe u pezullua nga detyra prej drejtorit të Përgjithshëm të Policisë së Shtetit, Gledis Nano, deri në një hetim të plotë e të pakushtëzuar prej organeve përkatëse.

Babai i vajzës, menjëherë pas ngjarjes, është konfrontuar me Taren, por i pafuqishëm të përballojë situatën dhe humbjen e vajzës, ka rënë në gjunjë në vajtim.

Pushuesit rreth e rrotull, kanë filmuar gjithçka.

Një ngjarje kjo, e cila është e përsëritur gjatë këtij viti, edhe pse në fatalitet ka kaluar për herë të parë.

Gjatë muajve të shkuar, skenarë thuajse identikë kanë ndodhur me mjete të tjera lundruese, të cilat kanë dalë në breg me shpejtësi të plotë dhe kanë goditur pushuesit në çadrat e tyre.

Fati më i keq këtë radhë, ka prekur familjen Avdia, të cilët kanë humbur vajzën e tyre, duke kaluar nga pushimet në një ferr të vërtetë.

Masat ndërkohë, ende priten, me një reagim të thelluar të strukturave shtetërore, për të bërë që bregdeti, të mos përgjaket më si Himara.

Dëshmia e Tases

Efektivi i pezulluar i Policisë së Shtetit, Arjan Tase, është marrë në pyetje nga oicerët e Agjencisë së Mbikëqyrjes Policore dhe me anë të dëshmisë së tij ka shpjeguar dinamikën e pretenduar të ngjarjes së rëndë të mesditës, e cila i mori jetën një vajze 7-vjeçare në plazhin e Potamit.

Sipas Tases, në çastin kur gomonia ka goditur vajzën e vogël ajo ka marrë gaz në mënyrë të menjëhershme dhe më pas ka bërë një rrotullim në vend.

Mjeti lundrues, në bazë të dëshmisë, ishte i djalit të xhaxhait të autorit, por edhe Tase vetë ka qenë i pajisur me leje drejtimi të mjeteve lundruese.

Itinerari i tij ishte nga Porto Palermo drejt Potamit, ku do të merrte gruan dhe fëmijët e tij, për t’i nxjerrë shëtitje me mjetin lundrues.

Mirëpo, gjithçka, përfundoi në një tragjedi të vërtetë me fatalitetin e 7-vjeçares dhe plagosjen e prindërve të saj.

Reagimet

Kryeministri i Shqipërisë, Edi Rama, ka reaguar me anë të një postimi në median sociale Twitter mbi ngjarjen e rëndë të ndodhur mesditën e 2 gushtit në Himarë, ku një vajzë 7-vjeçare ka mbetur e vdekur pasi është përplasur nga një mjet lundrues, i cili po kryente manovra të rrezikshme.

“Tragjedia e familjes së të miturës në Himarë është rrëqethëse dhe s’ka fjalë ngushëlluese për dhimbjen. Uroj që fajtori të marrë ndëshkimin më ekstrem nga drejtësia dhe drejtuesit e Policisë së Shtetit të nxjerrin mësimet e duhura e t’u japin mësimin e duhur trupave përgjegjëse!”, shkruan kreu i Qeverisë në Twitter.

Tragjedia e familjes së të miturës në Himarë është rrëqethëse dhe s'ka fjalë ngushëlluese për dhimbjen.Uroj që fajtori të marrë ndëshkimin më ekstrem nga drejtësia dhe drejtuesit e Policisë së Shtetit të nxjerrin mësimet e duhura e t'u japin mësimin e duhur trupave përgjegjëse!

— Edi Rama (@ediramaal) August 2, 2022

Ndërsa, një koment ai nuk e kurseu as për faktorin politik apo medial, duke hedhur akuza.

“Nuk mungoi as në këtë rast kafshëria politiko-mediatike e atyre që urojnë e presin veç fatkeqësi, për të ushqyer zjarrin e luftës së tyre politike të paudhë dhe të pashpresë!”, e përmbyll kryeministri reagimin.

Ish-presidenti i Shqipërisë dhe aktualisht kreu i Partisë së Lirisë, Ilir Meta, në një deklaratë për mediat ka thënë se “shteti ka rënë”.

Në kuadrin e një reagimi për ngjarjen e rëndë të ndodhur në Himarë, ku një efektiv i Policisë së Shtetit goditi për vdekje një vajzë shtatë-vjeçare, Meta bëri fajtore strukturat shtetërore dhe tha se “gjithçka Qeveria bën, është t’i shmanget përgjegjësisë”.

“Kujtoni ngjarjet e rënda ku policë me policë janë goditur, këto tregojnë që shteti ka rënë, kjo tregon që policia nuk është në shërbim të popullit, por përdoret”, parashtroi Meta në fjalën e tij.

Ai solli në kujtesë disa ngjarje, përfshi vrasjen e të riut Klodian Rasha nga një efektiv policie gjatë kohës së pandemisë, apo edhe vrasjeve të ndodhura në Fushë-Krujë dhe Milot së fundmi, ku autorët ende nuk janë vënë në pranga.

“Nuk jemi popull për tu shtypur nga askush dhe aq më tepër nga policia”, vijoi më tej ai. “Nuk kemi fëmijë për të humbur nga kjo papërgjegjshmëri dhe arrogancë”.

Teksa në mbyllje, kërkoi që të merren masa të menjëhershme për të rivendosur besimin mes Policisë dhe popullit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.