Nevoja për njerëzit: E fshehta e startup-eve të makinave vetëdrejtuese

Startup-et vetëdrejtuese si Cruise dhe Pony.ai kanë nisur të testojnë makinat e tyre pa shofer në disa pjesë të Kalifornisë, me veçorinë shtesë të operatorëve njerëzorë.

Agjencia e lajmeve, “Reuters”, tregon se teksa makina nuk ka shofer pas timonit, sedilja e pasagjerit është e zënë nga një operator sigurie, i cili “ka një buton të kuq që mund të ndalojë automjetin në rast se ndodh diçka”, sipas shefit ekzekutiv të Pony.ai, James Peng.

Ky operator pritet që të hiqet vitin e ardhshëm kur Pony.ai, investitorët e të cilit përfshijnë Toyota Motor Corp, të vendosë automjetet e veta pa shofer në zona të caktuara të Kalifornisë. Sidoqoftë, Peng ka siguruar se një operator i largët do të monitorojë automjetet dhe do të japë udhëzime kur automjetet të kenë probleme.

Waymo pastaj, mban personelin të veshur me jelekë të verdhë fluoreshentë të gatshëm për të ofruar ndihmë në rrugë për makinat e veta të automatizuara në Phoenix.

Një tjetër, Cruise, në pronësi të General Motors Co, nisi të operojë me pesë automjete pa shofer në San Francisko në tetor të vitit 2020, me një njeri në sediljen e përparme. Ndihmësi ka “aftësinë për të ndaluar automjetin në çdo moment gjatë udhëtimit”, ka thënë një zëdhënës i Cruise.

“Cruise e shikon zhvillimin e automjeteve vetëdrejtuese jo vetëm si një garë teknologjike, por edhe një garë besimi”, ka vijuar zëdhënësi.

Ai ka shtuar se “duke pasur parasysh këtë, ne i mbajmë njerëzit nën kontroll në testimin e automjeteve pa shofer jo vetëm si një mjet për zhvillimin e sigurt, por përtej kësaj, në mënyrë që të krijojmë besim tek publiku”.

Kurse gjiganti automobilistik i Koresë së Jugut, Hyundai Motor Group, ka investuar në startup-in e funksionimit në distancë të quajtur Ottopia, i cili do të ofrojë ndihmë në distancë për flotat robotaxi nga ndërmarrja e përbashkët e automjeteve Hyundai.

Tesla për shoferët: ‘Bëhuni gati për të vepruar’

Prania e vazhdueshme njerëzore në automjetet e automatizuara, nxjerr sfidat me të cilat përballet industria e automjeteve të automatizuara, e cila ka konsumuar miliarda dollarë në kapitalin e investitorëve gjatë dekadës së fundit.

Shumë kompani të automjeteve që drejtojnë vetveten po pranojnë nevojën për mendje njerëzore dhe po pakësojnë ambiciet e tyre.

Edhe Tesla Incm e cila kohët e fundit prezantoi një version të ri testues të asaj që e quan software “Full Self-Driving”, ka thënë në një mesazh për pronarët se shoferët “duhet të jenë të përgatitur për të vepruar menjëherë, në vende të rrezikshme, duke kaluar kryqëzimet apo në situata problematike”.

Në SHBA, rregullatorët e sigurisë kanë hapur një hetim zyrtar ndaj sistemit të ndihmës së shoferit të quajtur Autopilot të prodhuesit të automjeteve pas një serie aksidentesh fatale.

Ndihma rrugore e Waymo-së

Waymo ka zhvilluar teknologjinë e vetëdrejtimit për më shumë se një dekadë dhe ka nisur robotaksinë e parë komerciale në Phoenix në vitin 2018. Por pasardhësi i projektit pionier të makinave vetëdrejtuese të Google-it, ende i mban njerëzit në lak.

Waymo ka treguar për “Reuters” se drejton katër ekipe që monitorojnë dhe ndihmojnë flotën. Detyrat variojnë nga përgjigja në pyetjet e drejtuesve deri te sigurimi nga distanca i një “palë sysh të dytë” në situata të ndërlikuara siç janë mbyllja e rrugëve.

Ndërkohë, një nga ekipet e saj ofron ndihmë në rrugë për t’iu përgjigjur përplasjeve dhe incidenteve të tjera.

Ekipet “punojnë së bashku për të orkestruar funksionimin e flotës sonë plotësisht autonome gjatë gjithë ditës”, ka thënë Nathaniel Fairfield, një inxhinier software-ësh  në Waymo.

Gjithashtu ka dalluar se kompania nuk i përdor automjete me telekomandë.

Tanimë, Waymo planifikon të fillojë operacionet komerciale të automjeteve autonome në San Francisko fillimisht me drejtuesit e sigurisë. Dhe ajo mbështetet në një ushtri të operatorëve të automjeteve për të rritur testimet në mjedisin e dendur dhe kompleks të qytetit.

Një ish operator Waymo, i cili mori pjesë në testimin e San Francisko-s, ka thënë se duhej të “shkëputej” dhe të ndërhynte afërsisht 30 herë në ditë në rastet kur makina nuk arrin të ndalet mjaft shpejt për dritat e kuqe ose automjetet para që ngadalësojnë ose ndalojnë papritmas.

Sekreti i vogël, i lig

“Reuters” shkruan se rregullatorët po i mbajnë njerëzit të përfshirë me automjete të automatizuara.

Ligjet e Kalifornisë “kërkojnë një lidhje komunikimi të dyanshme që lejon prodhuesin të monitorojë vazhdimisht vendndodhjen/statusin e automjetit (pa shofer)”, ka treguar Departamenti i Automjeteve të Kalifornisë.

Kompani të tjera robotaxi po përdorin operimin në distancë si një mënyrë për të marrë automjete në rrugë.

Në Las Vegas, startup-i Halo u lejon klientëve të thërrasin një makinë pa shofer, e cila drejtohet nga një operator i largët njerëzor përmes rrjeteve pa tel të gjeneratës së pestë të shpejtë të operuar nga T-Mobile US Inc.

“Vetëm disa vjet më parë, ndihma e largët njerëzore ishte një sekret i vogël i lig në këtë hapësirë”, ka thënë Elliot Katz, bashkëthemelues i firmës së teleoperimit, Phantom Auto.

“Praktikisht, askush nuk foli për këtë publikisht sepse ishte akoma kjo fasadë që këto automjete do të ishin në gjendje të drejtonin në mënyrë autonome, kudo që ata duhet të shkojnë dhe të bëjnë gjithçka që do të bënte një shofer njerëzor”, ka theksuar ai.

Gjithashtu ka shtuar se “të gjithë tani e dinë që nuk do të jetë kështu”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.