Shqipëria

Nënshkruhen marrëveshjet e reja për “Open Balkan”


Edi Rama, Zoran Zaev dhe Aleksandar Vuçiç firmosin marrëveshjet në kuadrin e Open Balkan

Emërtimi do të ndryshojë, por koncepti vijon të mbetet i njëjtë. Zyrtarisht, Open Balkan!

 

Edi Rama, Aleksandar Vuçiç dhe Zoran Zaev prezantojnë nismën Open Balkan

Dy marrëveshje të reja dhe një memorandum, i cili do të nënshkruhet përfundimisht në një vend të dytë, u firmosën nga tre krerë të tre shteteve të Ballkanit Perëndimor.

Ata u mblodhën në Shkup për Forumin Ekonomik të Bashkëpunimit Rajonal të enjten e 29 korrikut.

Kryeministri i Shqipërisë, Edi Rama, homologu i tij maqedonas, Zoran Zaev dhe presidenti i Serbisë, Aleksandar Vuçiç, kanë konkretizuar dy marrëveshje të reja në kuadër të implementimit të katër lirive themelore të Bashkimit Evropian.

Marrëveshja e nënshkruar në kuadrin e “Open Balkan”
Marrëveshja e nënshkruar në kuadrin e “Open Balkan”

Marrëveshja e parë dhe më e rëndësishme është ajo e tregtisë së lirë midis tre vendeve të Ballkanit Perëndimor.

Në vitin 2023 do të hyjë në fuqi kalimi tërësisht i lirë i qytetarëve dhe mallrave midis Shqipërisë, Serbisë dhe Maqedonisë së Veriut.

“Korsi të shpejta” do të quhen pikat e dedikuara doganores, për të lejuar lëvizjen e lirë midis tre shteteve. Pritet që janari i vitit 2023 të faktojë marrëveshjen dhe të lejojë lëvizjen e lirë.

Marrëveshja e dytë është ajo në kuadër të “agjendës së gjelbër”.

Në të përfshihet mbrojtja dhe shpëtimi nga katastrofat natyrore për Ballkanin Perëndimor. Kjo agjendë synon njëkohësisht njehsimin me atë evropiane.

Memorandumi i përket lirisë së punës në tre vendet. Për shkak se Serbia dhe Maqedonia e Veriut ende nuk e kanë përshtatur legjislacionin me atë të Shqipërisë, pritet që ky memorandum të kthehet në marrëveshje, pasi dy vendet e tjera ta kenë përafruar ligjin.

Kur më pas të kthehet në marrëveshje dhe të hyjë në fuqi, qytetarët e tre vendeve nuk do të kenë më pengesa në gjetjen e punës midis tre shteteve. Pra, një koncept tërësisht identik me atë të Bashkimit Evropian.

Jo karikaturë e BE-së

“Ky rajon nuk mund të mbetet më peng i të shkuarës, në asnjë aspekt. Ne nuk jemi karikaturë ballkanike e BE-së”.

Kryeministri i Shqipërisë, Edi Rama, ka dhënë një mesazh të vetëm gjatë Forumit Ekonomik për Bashkëpunim Rajonal, i cili po zhvillohet në Shkup: “Duhet të vrapojmë, për të fituar kohën e humbur”.

Koncepti i njohur si Schengen rajonal është më pranë se kurrë. Këtë e kanë konfirmuar edhe kryeministri i Maqedonisë së Veriut, Zoran Zaev, dhe presidenti i Serbisë, Aleksandar Vuçiç. Ky i fundit madje ka pohuar me ambicie se 1 janari 2023 do t’i shohë të tre vendet pa kufij.

Rama, ndërkaq, është treguar i qartë kur thelbëson se projektimi i të ardhmes së Ballkanit është parësor. Brenda vitit të ardhshëm, sipas tij, do të ketë njehsim tërësor të lëvizjes së njerëzve dhe mallrave. Kjo, e shoqëruar me integrimin e pagesave të TVSH-së në vendet brenda marrëveshjeve.

Bazat mbi nismën janë ato të treguesve nga Banka Botërore sipas Ramës.

“Nëse duam të rrisim ekonominë, të vetëm rritemi me 2.5%. Nëse kemi marrëveshje, në 6.7%”.

Kjo është e vërteta e kryeministrit shqiptar, i cili “nuk e kupton skepticizmin e tre vendeve të tjera ballkanike, të cilat nuk pajtohen me nismën”.

Pritje, nuk mund të ketë!

“Nuk kemi pse presim që integrimin e rajonit ta bëjmë pasi të hyjmë në BE. Do ta bëjmë tani. Kjo nuk është nismë ekskluzive e tre vendeve tona. Kjo është një nismë e hapur për të gjithë. Kush do të bashkohet është i mirëpritur, por nuk mund të presim konsensus nga të gjithë të takohen”.

Shembulli i kryeministrit për këtë çështje. Mbetet ai i vetos bullgare ndaj Maqedonisë së Veriut. Me të tillë logjikë, nuk ka si veprohet më sipas tij.

Ndërsa akuzave se krijimi i një strukture të tillë i ngjan një Jugosllavie të vogël plus Shqipërinë, Rama iu përgjigj se, në rast të tillë, “Bashkimi Evropian është një Jugosllavi e madhe”.

“Çështjet e së shkuarës zgjidhen shumë më lehtë nëse sytë janë nga e ardhmja. Me sytë nga e shkuara, nuk ka çështje që zgjidhet në emër të së ardhmes”, ka përmbyllur Rama.

Më pak histori dhe më shumë ekonomi

Kryeministri i Maqedonisë së Veriut, Zoran Zaev, gjatë fjalimit të tij në Forumin Ekonomik Rajonal të Bashkëpunimit të mbajtur në Shkup, ka bërë me dije se ambicia e këtij forumi është krijimi i një hapësire vitale ekonomike.

“Jam këtu të flas për Ballkanin dhe popullin tonë”, ishte fjalia hapëse e Zaev-it.

Kryeministri maqedonas bëri me dije se do të ketë një marrëveshje dhe dy memorandume mes Shqipërisë, Serbisë dhe MV-së.

Ai ka theksuar që vendet e Ballkanit Perëndimor nuk mund të presin më që BE-ja të zgjidhë problemet e brendshme.

“Më pak histori dhe më shumë ekonomi për ne”, ishte mesazhi i Zaev-it.

Zaev deklaroi se, nisma rajonale mes Maqedonisë së Veriut, Serbisë dhe Shqipërisë përmban katër liritë e BE-së.

Në këtë forum do të ketë nënshkrim të memorandiumit, pasi pritet të ndryshojë legjislacioni i Serbisë dhe MV-së.

Në të, përmbahen edhe dispozita sa i përket formaliteteve për import-eksportin e mallrave, tranzitin e tyre apo bashkëpunimeve doganore.

Zaev ka ravijëzuar se në kuadër të bashkëpunimit do të rritet edhe Prodhimi i Brendshëm Bruto i secilit prej vendeve, ku sipas tij kjo do t’i ofrojë ata më afër Bashkimit Evropian.

Edhe njëherë Zaev i ka ftuar vendet e tjera të rajonit të bëhen pjesë e nismës rajonale.

“Qëllimi përfundimtar është të arrijmë ‘no stop-just go’, të mos ketë ndalesa në kufijtë mes Serbisë, Maqedonisë së Veriut, Shqipërisë dhe të shpresojmë edhe për vendet tjera”, finalizoi Zaev.

2023-shi pa kufij

Fill pas fjalës së Zaev-it, në podium u ngjit kryeministri i Serbisë, Aleksandar Vuçiç. Gjatë fjalimit të tij, ai u shpreh se “nuk duhet të presim nga të tjerët, por të marrim vetë fatin tonë në dorë”.

“Qytetarëve tanë duhet t’u dëshmojmë që jemi të aftë të mendojmë për vetveten dhe të mos presim që dikush do të na udhëzojë apo drejtojë, të marrim përsipër fatin tonë”, ka deklaruar kryeministri serb.

Vuçiç njoftoi se, më 1 janar të vitit 2023, nuk do të ketë më kufij mes tre shteteve dhe nuk do të ndalohet më askush.

“Ne duhet të kemi besim të plotë te njëri-tjetri, sepse vetëm kështu nuk do të shikojmë të keqe apo qëllim të fshehtë në propozimet tona”, u shpreh ai.

Gjatë deklaratës së tij, kryeministri bëri me dije se më 15 tetor do të ketë një takim në Beograd dhe më pas në Shqipëri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore