Nenet e Marrëveshjes së 2013-ës “copy-paste” në statutin “modern dhe evropian” për Asociacionin

Pothuajse të gjitha nenet që kanë të bëjnë me Asociacionin e Komunave me Shumicë Serbe (ASMM) janë bartur të plota nga Marrëveshja e Parë (2013) për normalizimin e marrëdhënieve midis Kosovës dhe Serbisë dhe Marrëveshja për Parimet e Përgjithshme (2015) në draft-statutin “modern dhe evropian” për ASMM-në të pranuar në parim nga Qeveria e Kosovës.

Përkundër se kryeministri i Kosovës, Albin Kurti, ka pretenduar se draft-statuti i prezantuar nga Bashkimit Evropian (BE) dhe Shtetet e Bashkuara të Amerikës (SHBA) për ASMM-në nuk ka asnjë lidhje me marrëveshjet e kaluara në kuadër të dialogut Kosovë-Serbi, disa pika të Marrëveshjes së Parë janë përmbledhur përbrenda versionit evropian të ASMM-së.

Në nenin 1 të Marrëveshjes së Parë kushtuar themelimit të ASMM-së thuhet se “anëtarësimi do të jetë i hapur për çdo komunë tjetër me kusht që anëtarët janë në pajtim”. Kjo gjendet në nenin 5 të draft-statutit ku thuhet se “anëtarësimi do të jetë i hapur për çdo komunë tjetër” dhe “anëtarësimi do të bazohet në parimin e pjesëmarrjes vullnetare”.

Ndërkohë edhe neni 2 i Marrëveshjes së Parë të ratifikuar në Kuvendin e Kosovës (2013) merret pikë reference në nenin 4 dhe 5 të draft-statutit të prezantuar nga emisarët e SHBA-ve, BE-së, Francës, Gjermanisë dhe Italisë, në përpjekje për ripërtëritjen e procesit të dialogut për normalizimin e marrëdhënieve, ku flitet për miratimin e statutit dhe shpërbërjen e ASMM-së.

“Bashkësia/Asociacioni do të krijohet përmes statutit. Shpërbërja e Bashkësisë/Asociacionit mund të bëhet vetëm me vendim të komunave pjesëmarrëse. Do të ofrohen garanci ligjore përmes ligjit të zbatueshëm dhe të drejtës kushtetuese (përfshirë rregullën për shumicën prej 2/3)”, thuhet në nenin 2 të Marrëveshjes së Parë.

“Asociacioni mund të shpërndahet vetëm me vendim të Kuvendit të miratuar me shumicë prej dy të tretave të delegatëve të saj. Në rast se merret vendim për shpërbërjen, shpërbërja e Asociacionit bëhet nga Ministria e Administrimit të Pushtetit Lokal”, thuhet në nenin 5, pikën 8 të draft-statutit.

Sa i përket strukturës organizative, ashtu sikurse neni 3 i Marrëveshjes së Parë, draft-statuti parasheh gjithashtu se ASMM-ja do të përbëhet nga të njëjtat organe, sikurse asociacioni ekzistues i Komunave të Kosovës: kuvendi, kryetari, nënkryetari, këshilli, bordi, administrata dhe zyra e ankesave. Dhe kjo reflektohet në nenin 1 të draft-statutit të ASMM-së.

Neni 4 i Marrëveshjes së Parë për kompetencat e ASMM-së të parapara me Kartën Evropiane për Vetëqeverisje Lokale dhe ligjin e Kosovës, janë reflektuar edhe në nenin 14, 15, 16, 17,18, 19 dhe 20 të draft-statutit, ku përfshihet një “mbikqyrje të plotë” në fushën e zhvillimit ekonomik, arsimit, shëndetësisë e kujdesit social, kulturës, planifikimit urban dhe rural.

“ASMM-ja do të ushtrojë kompetenca të tjera shtesë siç mund të delegohen nga autoritetet qendrore”, thuhet në nenin 5 të Marrëveshjes së Parë, ndërsa në nenin 13 të draft-statutit thuhet se “ASMM-ja mund të ushtrojë kompetenca të tjera shtesë që mund të delegohen nga autoritetet aendrore në përputhje me kushtetutën dhe legjislacionin në fuqi”.

Duke vepruar në emër të ASMM-së, katër kryetarët e komunave veriore të Kosovës – Mitrovicë e Veriut, Leposaviq, Zveçan dhe Zubin Potok – do t’i ofrojnë Ministrisë së Punëve të Brendshme  listën e kandidatëve për emërimin e Komandantit Rajonal të Policisë së Kosovës, siç parashihet në nenin 9 të Marrëveshjes së Parë.

“Do të ketë një Komandant Rajonal të Policisë për katër komunat veriore me shumicë serbe. Komandanti i këtij rajoni do të jetë një serb i Kosovës i nominuar nga Ministria e Punëve të Brendshme nga lista e ofruar nga katër kryetarët e komunave në emër të Bashkësisë/Asociacionit”, specifikohet në nenin 9 të Marrëveshjes së Parë, zgjatuar në nenin 43 të draft-statutit.

“Katër kryetarët e komunave veriore të Kosovës – përderisa janë anëtarë të ASMM-së – do t’i ofrojnë Ministrisë së Punëve të Brendshme listën e kandidatëve për emërimin si Komandant Rajonal i Policisë së Kosovës, siç specifikohet në nenin 9 të Marrëveshjes së Parë”, thuhet në nenin 43 të draft-statutit mbi policimin.

Sëkëndejmi, mbetet për t’u parë nëse ASMM-ja do të jetë vetëm një rojtare/përgjegjëse për komunikimin ndërmjet komunave me shumicë serbe dhe Qeverisë së Kosovë apo një autoritet ekzekutiv që përfaqëson të gjitha komunat serbe në Kosovë, duke tejkaluar edhe kompetencat e fitura nga Marrëveshja e Parë që ka ende fuqinë e një marrëveshje ndërkombëtare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.