Jetesë & Stil

Në ditën e zgjedhjeve, Rama e Vitia postojnë nga një “selfie” me gratë e tyre


Të dielën e 14 nëntorit po mbahet raundi i dytë i zgjedhjeve lokale në saktësisht 21 komuna të Republikës së Kosovës, ndërkohë që të hershëm në votim kanë qenë edhe dy kandidatët për kryetar të Prishtinës – Përparim Rama nga Lidhja Demokratike e Kosovës (LDK) si dhe Arben Vitia nga radhët e Lëvizjes Vetëvendosje (LVV).

Rama e Vitia, procesin e votimit e kanë kryer rreth orës 9 të mëngjesit, ndërsa të dy kanë qenë të shpejtë edhe në publikimin e fotografive të tipit “selfie” në mediat sociale me bashkëshortet e tyre.

Imazh i publikuar nga Përparim Rama në Facebook.

“Mirëmëngjesi Prishtinë. Një ditë e shkëlqyeshme me diell, një ditë fantastike për të filluar transformimin e Prishtinës”.

“Shumë dashni për Prishtinën tonë”, ka shkruar në Facebook, kandidati i LDK-së për të parin e Prishtinës, Përparim Rama, në një “selfie” të publikuar bashkë me gruan e tij, Kristale Ivezaj.

Ndërkaq, kandidati i LVV-së për kryetar të Prishtinës, Arben Vitia, kishte zgjedhur përshkrim pak më të shkurtër dhe më të thjeshtë karshi fotografisë me gruan e tij, Merita Kasumi – Vitia.

Imazh i publikuar nga Arben Vitia në Facebook.

“Pas votimit, bashkë me Meritën në rrugën B po e pijmë nga një kafe. Ditë e mirë për kryeqytetin”, ka shkuar Vitia në postimin e ndarë me ndjekësit në llogarinë e tij zyrtare të Facebook-ut.

Përndryshe, Arben Vitia nga Lëvizja Vetëvendosje nuk arriti të fitojë në raundin e parë të zgjedhjeve, pasi mori vetëm 42,33% të votës së përgjithshme për Prishtinën, pasuar nga Përparim Rama i Lidhjes Demokratike të Kosovës, me 29,35% të votave, çka bëri që dyshja të shkojnë në raund të dytë zgjedhor.

/Albanianpost.com


Lajmet kryesore