Ndiqet rrugëve të Pejës me armë, policia e cilëson rastin veç si “ngacmim”

U sulmua me armë e u ndoq rrugëve të qytetit të Pejës me veturë rreth orës 2:00 të mëngjesit, të hënën, por sulmuesit e tij janë ngarkuar vetëm për dyshimin e veprës së “ngacmimit”.

Në raportin 24 orësh thuhet se “është arrestuar i dyshuari mashkull kosovar, pasi që i njëjti pas një mosmarrëveshje, në bashkëveprim me disa persona tjerë dhe duke ekspozuar armën e kanë sulmuar fizikisht viktimën mashkull kosovar. Me vendim të prokurorit i dyshuari është dërguar në mbajtje”.

I dëmtuari në këtë rast, Shpëtim Shala, ka deklaruar për Albanian Post se ndjehet shumë i shqetësuar dhe frikësuar pas këtij cilësimi të rastit nga policia.

“Nëse policia nuk merr masa më shumë për këtë rast e nuk e rivlerësojnë lëndën nga ‘gacmim’ në në sulm fizik a diçka tjetër si tentim vrasje, unë ndjehem i rrezikuar. Ai prapë lirohet nga paraburgimi e unë prapë do të përballem me sulmuesin”.

“Ai mund të më sulmoj prapë. Herën e parë i kam ikur, por kush garanton që unë mund të iki prapë? Çka nëse më vret kësaj here?”, ka thënë Shala për Albanian Post.

Shala ka angazhuar avokatin Agim Haxhijaj, për ta udhëzuar dhe mbrojtur në këtë rast.

Në një prononcim për Albanian Post, Haxhijaj ka deklaruar se ky cilësim i policisë për rastin në fjalë është tendencë për ta minimizuar rastin.

“Jam i shqetësuar për këtë rast. Në bazë të asaj që ka deklaruar i mbrojturi im është krejt diçka tjetër nga ajo që ka cilësuar policia. Po pres shkresat e lëndës, sepse akoma nuk na i kanë dorëzuar, por kjo duhet rishikuar. Është gabim. Po shihet që ka tendenca me e bë sa më të vogël dënimin për sulmuesin meqë ai ka të afërm në Polici të Kosovës”, ka thënë Haxhijaj për Albanian Post.

“Ky cilësim i rastit nga prokurori është gabim”, specifikon Haxhijaj.

Si ndodhi rasti i Shpëtim Shalës?

Një ditë më parë, Albanian Post kishte raportuar se si Shpëtim Shala nga Peja, kishte dalë në kohë të syfyrit për të blerë diçka në market. Rreth orës 2 natës, të hënën, ai ishte ndalur tek market “Hello” në afërsi të stacionit të trenit në Pejë.

“Ishte një golf 7 i parkuar, e unë u ndala pas tij. Nuk e dita as kush janë as nuk i njofta as nuk kisha asgjë me ta. Jam kthyer të flas me një shok që e kisha në veturë, se çka po marrim për të prirë. Ka ardhur një person ma hapi derën e veturës dhe nxori armën nga beli. Me erdhi papritur, thash ‘a je tu më lyp mu, a po më njeh a çka është problemi?’”, tregon Shala rrëfimin e tij për Albanian Post.

“Mandej i kom pa edhe 4-5 persona të tjerë duke ardhur me shufra të metalit, duke ardhur në drejtim tim. Unë nuk dita si të reagoj, e kam ndezë veturën dhe jam nis, e kam mbyll derën e veturës. Ika se u frikësova po më ndodhë diçka, ata kanë mund me më rrahë a çka po di unë”, tregon Shpëtim Shala.

Shala thotë se rrugës në ikje, ka telefonuar Policinë e Kosovës në numrin 192. Deri sa po përpiqej t’u ikte sulmueseve të cilët po e ndiqnin nga pas.

“Policia njëherë menduan që jam duke i gënjyer, mandej më thanë hajde kah stacioni i policisë e ki patrullën te rrethi. Jam kthyer, kam shkuar aty ku më thanë, jam sille të rrethi 4 – 5 herë, askund nuk pash patrullë të policisë edhe vazhdova”.

“Pastaj më thanë nisu kah rrethi i spitalit, aty ke një patrullë, unë i dëgjova dhe u nisa të shkoj në atë drejtim, por as aty nuk takova asnjë polic, asnjë veturë të policisë”, vazhdon rrëfimin Shala.

“I stresuar dhe i nervozuar unë e di që jam shprehur keq, por ishte nga situata që gjendesha, i thash ‘a po zajabateni me mua apo çka?’”.

Pas kësaj, Shala thotë se dëgjoi një të sharë nga dikush në anën tjetër të telefonit.

“E një aty u dëgjua kur më tha – nuk jemi tu të zajabatë he nanën ta shk******* – unë e dëgjova, shumë mirë e dëgjova. Nuk më shau polici që po fliste me mua, por dikush tjetër aty, që mund të ketë qenë një polic tjetër, por nuk e di kush. Mandej pyeta – kush më shau aty? Nuk foli askush, asnjë nuk më dha përgjigje, në ndërkohë unë isha duke e ngarë makinën shpejt, me një dorë, e me tjetrën në telefon me policinë”.

“Gati 30 minuta meta tu u sill rrugëve të Pejës edhe askush nuk u mor me mu, ai sulmuesi ka mundur të më vras”.

Më pas, Shala thotë se për t’u ikur atyre që po e ndiqnin, ka hyrë në shesh të Pejës me veturë, që njihet si “korza e Pejës”, ku pas 2-3 minutave ka ardhur policia.

Situata në Stacionin Policor të Pejës

Me të shkuar në stacion të policisë në Pejë, Shala tregon se u intervistua nga disa zyrtar policorë.

Sipas tij, tre nga zyrtarët policorë që po merreshin me të “insistonin që sulmuesi nuk kishte armë, në momentin kur më ndaloi tek marketi”.

“Unë isha viktima aty e ata u munduan ta mbronin atë sulmuesin. Unë ju tregova që ka pas armë, një polic aty më tha ‘jo s’ka pas armë, je ka rren e s’po na tregon drejt’. Ja nisën me më bë presion, donin me më shti me thanë që ai s’ka qenë me armë. T’u u tutë mos me deklaru qysh o kanë rasti”, rrëfen Shala.

Por më vonë, gjatë deklaratës, Shala thotë se e kuptoi shkakun e këtij presioni.

“Një polic më tha ‘a e njeh me pa’, thash ‘po’. Mandej ma treguan një foto, thash ‘po ky është’. Ai polici tha F.Çeku është, e mandej më tha që ky sulmuesi është djali i axhës së atij kolegut, policit Kastriot Çeku. Aty e morra vesh unë që janë familjar mes vete”.

“Donin me shkru rastin veç ngacmim e diçka të vogël, por unë ju thash nuk ka qenë ngacmim, por sulm me armë, ai ka mund edhe me më vra se ka qenë i dehur”. Por, megjithatë rasti, tregon Shala, është inicuar vetëm si ngacmim.

Shala thotë se ngado nga ka lëvizur me veturë, duke filluar nga marketi, ka kamera të sigurisë të cilat mund të vërtetojnë deklaratën e tij.

I dyshuari dërgohet në mbajtje, viktima të ankohet në IPK për zyrtarët policorë

I pyetur nga Albanian Post, zëdhënësi i Policisë Rajonale në Pejë, Driton Rugova ka thënë se nuk qëndrojnë asnjë nga pretendimet e palës së dëmtuar në këtë rast.

“Nuk besoj që ka ndodhë ajo, sepse askush nuk i thotë askujt me ndërru deklaratë. Në Kosovë krejt e kemi nga një familjar diku t’u punu. Me pas qenë ashtu policia nuk e kish ndalë fare, por ja që i është ndalu dhe me urdhër të prokurorit i dyshuari është dërguar në mbajtje për 48 orë”, ka thënë Rugova.

Por, nëse i dëmtuari në këtë rast do ta dërgojë rastin e keqtrajtimit të zyrtarëve policorë edhe më tej, mund të bëj një denoncim në Inspektoratin e Policisë së Kosovës.

“Ndërsa pala e dëmtuar në këtë rast, nëse ka ankesa, ka të drejtë të lajmëroj rastin në Inspektorat të Policisë së Kosovës. Nëse konsideron që ju ka bë e pa drejtë, e kanë shti me ndërru deklarate e çkado që i ka ndodhë”.

Me urdhër të prokurorit, i dyshuari F.Çeku është dërguar në mbajtje për 48 orë.

Rugova ndër të tjera, ka thënë se “Policia nuk ka të drejtë të bëj asgjë më shumë në këtë drejtim”.

I dëmtuari, Shpëtim Shala, të hënën gjatë ditës, ka deponuar një ankesë elektronike në llogari të Inspektoratit Policor të Kosovës, për keqtrajtimin që i bënë zyrtarët e policisë në këtë rast.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.