Ndalimi i policëve të Kosovës nga Serbia, Rohde: E papranueshme, politikanët serbë të reagojnë
Ambasadori i Gjermanisë në Prishtinë, Jorn Rohde, ka thënë se ndalimi i zyrtarëve policorë të Kosovës nga Serbia është i papranueshëm, derisa ka shtuar se një gjë e tillë s’është diçka që mund të pritet nga një vend kandidat për Bashkimin Evropian, siç është Serbia.
Këto komente, Rohde i ka bërë përmes një postimi në platformën X, pasi që Serbia ka ndaluar disa zyrtarë policorë të Kosovës – disa prej tyre të liruar tashmë – të mërkurën.
“Depërshkallëzimi tani! Ndalimi i zyrtarëve të zbatimit të ligjit të Kosovës, përfshirë serbë, nga autoritetet e Serbisë është i papranueshëm dhe sigurisht jo diçka që mund të pritet nga një vend kandidat për BE”, shkroi Rohde.
Diplomati gjerman ka potencuar që kjo duhet të përfundojë menjëherë dhe “ne presim që politikanët serbë të ngrisin zërin për bashkëqytetarët e vet”.
De-escalation now! Detention of 🇽🇰 law enforcement officials, incl K-Serbs, by 🇷🇸 authorities is unacceptable & certainly not what can be expected by a 🇪🇺-candidate country. This has to end immediately & we expect K-Serb politicians to also speak up for their fellow citizens!
— Ambassador Jörn Rohde (@GermanAmbKOS) April 18, 2024
Ndryshe, para pak çastesh, Kryeministri i Kosovës, Albin Kurti, ka njoftuar se katër zyrtarë policorë të Kosovës, janë liruar ndërsa zëvendësdrejtori i Policisë së Kosovës, Dejan Jankoviç, vazhdon të jetë në mbajtje nga autoritetet serbe.
Kurti lajmin e ka bërë të ditur gjatë mbledhjes së Qeverisë së Kosovës.
“Tashmë katër zyrtarë policorë janë liruar, por zëvendësdrejtori i Policisë vazhdon të mbahet në burg”, tha Kurti.
Kryeministri theksoi se me ndalimin e qytetarëve të Kosovës në pikat kufitare të Serbisë, Beogradi shkeli një sërë marrëveshjesh.
“Duke përfshirë marrëveshjen e korrikut të vitit 2011 për lëvizje të lirë të qytetarëve, marrëveshjen e nëntorit të vitit 2022 për lëvizje të lirë me karta të identitetit mes vendeve të Ballkanit Perëndimor dhe marrëveshjen bazike të shkurtit të vitit 2023 në Bruksel për normalizim marrëdhëniesh dhe fqinjësi të mire”, ka thënë Kurti.
Ai shtoi se ky veprim kujtoi veprimet e hidhura të ish-presidentit fashist serb, i njohur si “Kasapi i Ballkanit”, Sllobodan Millosheviç-it në vitet 1998-1999.
“Ndalimi dhe mbajtja arbitrare e pabazë dhe keqtrajtimi i qytetarëve të Kosovës nga ana e Serbisë, vetëm e vetëm sepse e përdorin Serbinë si vend tranzit na risolli kujtimet e hidhura të Serbisë së Millosheviçit, duke na rikujtuar kështu se ajo mbetet e njëjta ngase udhëhiqet nga një ish vartës i tij”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
