Shqipëria

NATO në Madrid për sigurinë dhe më shumë – Çfarë pritet?


Tre-ditëshi i NATO-s merr hov zyrtarisht sot, në një samit të vendeve anëtare, i cili jo vetëm që pritet të ketë diskutime mbi çështjet më të rëndësishme të sigurisë euroatlantike, por edhe vendimmarrje me rëndësi të lartë për rajonin e më gjerë.

Lufta Ukrainë-Rusi, zgjerimi i NATO-s me Suedinë e Finlandën apo koncepti i ri strategjik i aleancës, do të marrin zërin kryesor.

Ashtu si zë kryesor, mund të marrë edhe një vendim me rëndësi për hapjen e negociatave mes Bashkimit Evropian dhe Shqipërisë e Maqedonisë së Veriut, siç zbuloi Albanian Post të dielën e 26 qershorit.

Në terma të gjerë, ajo çfarë do të nënvizohet më së shumti, është nevoja që Ukraina ka për ndihmë, qoftë financiarisht, qoftë ushtarakisht.

Mbështetja e një koncepti strategjik të mbështetjes së Kievit, pritet të hidhet në tryezën e diskutimeve që ditën e parë të samitit në Madrid.

Po ashtu, një diskutim i mundshëm që pritet, është edhe ai sfidës që paraqet rritja e Kinës në sferën e ndikimit global, ku sigurisht përfshihet edhe rajoni i Evropës Lindore dhe Ballkanit Perëndimor.

Për mbrojtjen e territorit në vendet anëtare, NATO ka në gatishmëri 40 mijë trupa, me ndiha të shtuara nga ajri apo deti.

Grupet e betejës në detin Baltik dhe në atë të Zi janë dyfishuar që prej fillimit të luftës në Ukrainë, për t’i paraprirë përshkallëzimeve të mundshme.

Pjesë e misioneve, janë edhe trupat shqiptare, si pjesë integrale e NATO-s.

Finlanda dhe Suedia nuk do të gjejnë menjëherë një derë të hapur në Samit, por pritet që diskutimet të bëhen më konkrete e reale me pjesëmarrjen e përfaqësuesve nga dy shtetet nordike në samit.

Sfida e vërtetë, do të jetë bindja e Turqisë për të pranuar këtë zhvillim, për shkak të një mosdakordësie që Ankaraja ka pasur, mbi të gjitha për Suedinë, nën akuzën se kjo e fundit ka mbështetur grupimin e shpallur terrorist në Turqi, PKK.

Po një çështje tjetër e Ankarasë, ajo me Greqinë për integritetin territorial dhe pretendimet e secilës palë mbi Qipron, pritet të trajtohen në samit.

Me interes pritet zëri aktiv i Shqipëri në këtë periudhë tre-ditore, duke qenë se vendi aktualisht mban edhe presidencën e Këshillit të Sigurimit të OKB-së për muajin qershor.

/Albanianpost.com


Lajmet kryesore