Nancy Pelosi do të kandidojë sërish për Kongresin Amerikan

Ish-kryetarja e shumicës demokrate të Dhomës së Përfaqësuesve, Nancy Pelosi tha se do të kandidojë për rizgjedhje si përfaqësuese e Kalifornisë në Kongres në vitin 2024, duke hedhur poshtë spekulimet se ajo do të tërhiqej.

“Vendi ynë duhet t’i tregojë botës se flamuri ynë ende po shkëlqen. Prandaj do të kandidoj sërish”, tha 83-vjeçari Pelosi përmes rrjetit social X, transmeton “Associated Press”.

Ajo e tha këtë para aleatëve në distriktin e San Francisko-s që e ka përfaqësuar për më shumë se 35 vjet.

Vendimi i saj u njoftua në një kohë kur republikanët kontrollojnë dhomën e ulët të Kongresit amerikan, por me një shumicë të ngushtë.

Demokratët besojnë se kanë një shans për të rimarrë kontrollin e dhomës së ulët në vitin 2024, kur presidenti Joe Biden kandidon për një mandat të dytë.

Njoftimi i Pelosi-t i jep fund bisedave për pensionimin e saj pasi ajo mbetet një udhëheqëse me ndikim, një figurë e rëndësishme partiake dhe një mbledhëse e fortë fondesh për demokratët.

Njoftimi vjen gjithashtu në një kohë kur në SHBA ka diskutime të ashpra për plakjen e politikanëve, presidenti Joe Biden është 80 vjeç, rivali i tij Donald Trump është 77 vjeç.

Pelosi ishte kryetarja demokrate e dhomës së ulët të Kongresit amerikan dhe në nëntor të vitit të kaluar ajo dha dorëheqjen si kryetare e demokratëve në atë Dhomë, duke deklaruar se donte t’i hapte rrugën një brezi të ri.

Ajo mbeti në Dhomën e Përfaqësuesve si përfaqësuese e Kalifornisë, dhe megjithëse ishte vetëm një përfaqësuese e zakonshme, ajo mbajti ndikim të madh në Capitol, ku ndodhet që nga viti 1987.

Për një kohë të gjatë, si kryetare e dhomës së ulët, ajo ishte personi i tretë më i rëndësishëm në shtetin amerikan, pas presidentit dhe zëvendëspresidentit të vendit, u zgjodh për herë të parë kryetare e dhomës së ulët në 2007.

Ajo njihet për rolin e saj si kundërshtarja kryesore e Donald Trump, kundër të cilit luftoi ashpër kur ai ishte president i vendit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.