Musliu: “Zajdenica” e Albin Kurtit kalon me vetëmenaxhim, me autonomi e financim nga Serbia

Deputetja nga radhët e Partisë Demokratike të Kosovës, Ganimete Musliu, në fjalën e saj në kuvend ka thënë se Asociacioni i Komunave me Shumicë Serbe, apo siç e quajti ajo, në serbisht ‘Zajednica’ – siç e kishte quajtur kryeministri Albin Kurti si opozitar – të cilin Kosova e ka pranuar, është vetëmenaxhim, e autonomi dhe se do të financohet nga Serbia.

“Kur të kemi transparencë të plotë rreth kërkesave që përmban dokumenti në fjalë, atëherë mund të deklarohemi për përmbajtjen. Sot mund të deklarohemi se Albin Kurti nga ‘Zajednica nuk kalon’, ka kaluar në ‘Zajednica kalon’ – bile ‘Zajednica’ e Albin Kurtit kalon me vetëmenaxhim, me autonomi dhe me financim nga Serbia”, ka thënë Musliu.

Ajo theksoi se dialogu me Serbinë e ka konsumuar aq shumë debatin publik në këtë vend, “saqë shumë kush e ka parë si trampolinë të vetme për të qenë në skenën politike”.

“Duke thurur teoria se kush është patriotë dhe kush tradhtar janë lënë anash qëllimshëm proceset e brendshme politike dhe degradimi i brendshme shoqëror”, shtoi Musliu.

Këta individë, beson ajo, “të cilët e kanë përdorur dhe keqpërdorur këto proces, janë ata individë që bëjnë pazare me dhimbjen dhe sakrificën e popullit”. Janë individë të papërgjegjshëm dhe të pandërgjegjshëm”.

“Individi kryesor në kategori është Albin Kurti, i cili tani në tre vjetorin e qeverisjes së tij ka vërtetuar vetëm një gjë: është një udhëheqës i dështuar në politikën e brendshme, kurse në politikën e jashtme ka vërtetuar se është i dështuar, por edhe i nënshtruar”.

Gjatë gjithë karrierës së tij, tha Musliu, Kurti ka folur shumë, ka akuzuar shumë, ka premtuar shumë, por mbi të gjitha “ka rrejt shumë”. “Me demagogji, Albin Kurti, Kosovës ia vodhi 10 vjet progres në rrugën e saj integrues dhe zhvillimore”.

“Tani ky individ vjen dhe thotë se e ka pranuar ‘Zajednicën’ e tij të famshme. Këtë veprim duhet t’ia sqarojë së pari elektoratit të vet – atij elektorati që ende beson në përrallat e tij”.

“Kurse për të tjetër ai duhet të tregojë se çfarë ka pranuar e që nuk e kanë pranuar serbët”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.