Musliu pas raportimit të drejtorit të AKI-së: Në afërsi të Izvorit po ndërtohet një bazë ushtarake

Deputetja e Partisë Demokratike të Kosovës si dhe kryetarja e Komisionit për Mbikëqyrjen e Agjencionit Kosovar të Inteligjencës (AKI), pas raportimit të kryetari të Agjencisë së Inteligjencës së Kosovës, Petrit Ajeti ka thënë se situata aktuale në Kosovë “është e brishtë dhe e tensionuar”.

Ajo ka bërë të ditur se në zonën e Izvorit po ndërtohet një bazë ushtarake.

“Dua te theksoj me bindje të plotë se AKI-ja bashkë me Policinë kanë qenë në detyrën e tyre dhe e kanë kryer në mënyrë perfekte dhe në kohë. Siç e dini se Serbia kishte pretendime territoriale dhe kishte pretendim ne mbajtjen e krizës ne lidhje me interesat e Rusisë”.

“Diçka e re që morëm nga AKI-ja është vërejtur rritja e pranisë të ushtrisë së Serbisë në kufi. E në afërsi të Izvorit është duke ndërtuar një bazë ushtarake. Ajo çka vlen të theksohet se gjendja e sigurisë është e brishtë”, ka thënë deputetja e PDK-së pas mbledhjes së këtij Komisioni.

Musliu, ka thënë se në sfida të tilla duhet të jenë të gjithë të bashkuar, pa marrë parasysh interesave politike.

“E kemi të qartë se grupi terroriste i mbështetur nga Serbia kishte pretendime territoriale, anëtarët e AKI-së edhe një herë e kanë dëshmuar profesionalizmin e tyre”.

“Pasuria e vendit tonë është mbi interesat personale e partiake dhe duke u nisur nga kjo duhet të jemi të gjithë unik dhe në asnjë formë dhe në asnjë rrethanë të mos e dëmtojmë imazhin e tyre”, ka thënë Musliu.

Ajo tutje ka bërë të ditur se institucionet e sigurisë janë përgjigjur në kohë të saktë dhe të menjëhershme.

“Dua të theksoj që AKI bashkërisht me forcat e Policisë së Kosovës kanë qenë në krye të detyrës dhe në kohë reale u janë përgjigjur provokimeve nga ana e Serbisë”.

Një grup i armatosur, që sipas autoriteteve përbëhet prej rreth 30 personash, sulmuan Policinë e Kosovës në Banjskë të Zveçanit më 24 shtator, duke lënë të vrarë rreshterin Afrim Bunjaku.

Ministri i Punëve të Brendshëm, Xhelal Sveçla, të dielën në një konferencë për media tha se vendi i tij ka mbledhur prova që dëshmojnë se Serbia u përpoq ta aneksojë Veriun e Kosovës dhe se sulmuesit u përgatitën për një kohë të gjatë në bazat ushtarake të ushtrisë serbe brenda Serbisë.

“Serbia u mundua vazhdimisht të thotë se nuk ka të bëjë asgjë më këtë sulm, por faktet që do të publikohen dëshmojnë që përgatitjet, trajnimet dhe ushtrimet e këtij grupi u kryen në bazën e trajnimeve ushtarake afër Jagodinës si dhe në Kopaunik”.

“Këto pamje u siguruan nga dronët e grupit terrorist të cilët i kemi konfiskuar”, tha ai.

Të premten, Millan Radoiçiçi e mori përgjegjësinë për këtë sulm, dhe dha dorëheqje nga posti i nënkryetarit të Listës Serbe partisë më të madhe të serbëve në Kosovë, e cila e ka mbështetjen e Qeverisë serbe.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.