Musliu: Më duhet të tërhiqem përkohësisht nga puna, intervenimi duhet kryer jashtë vendit

Deputetja nga radhët e Partisë Demokratike të Kosovës (PDK), Ganimete Musliu, ka bërë të ditur se duhet të tërhiqet përkohësisht nga puna e saj në Kuvendin e Kosovës, për shkak të problemeve shëndetësore që është duke pasur aktualisht.

“Me duhet të tërhiqem përkohësisht nga puna ime e përditshme, dua t’ju falënderoj të gjithëve padallim, që më keni shkruar, jeni lutur për mua dhe më keni uruar gjithë të mirat”.

Musliu, përmes një shkrimi në rrjetin social ‘Facebook’, ka thënë se problemi i saj shëndetësor është tash e dy vite.

“Ju njoftoj se, pas një vizite të mjeku në QKUK, rreth dy vite më parë u diagnostikova me një problem në zemër. Gjatë gjithë kohës jam trajtuar në Kosovë dhe dua të falënderoj të gjithë mjekët që punojnë në repartin e Kardiologjisë dhe Kardiokirurgjisë në QKUK dhe në Spitalin Amerikan që u kujdesën për mua”, ka shkruar ajo. 

Ajo tutje ka deklaruar se për shkak të sistemit shëndetësor të dobët në Kosovë, shërimin duhet ta kërkoj në vende të tjera.

“Tani, me rekomandim të mjekëve kosovarë, më duhet t’i nënshtrohem një ndërhyrjeje kirurgjikale, e cila (për fat të keq) do të kryhet jashtë vendit, pasi që mjekëve në Kosovë, përkundër kompetencës së shkëlqyer profesionale, ende nuk u janë krijuar kushtet që ata i meritojnë”.

“Sistemit shëndetësor të Kosovës realisht i mungojnë shumë gjëra përveç mjekëve, kështu që shpresoj që kjo gjendje të përmirësohet dhe askush të mos detyrohet t’i nënshtrohet procedurave të shërimit jashtë vendit”.

Gjatë së dielës, u raportua se Musliu do të dërgohet për shërim jashtë vendit për të trajtuar problemin shëndetësor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.