Musk thyen rekordin botëror për humbjen më të madhe në histori të pasurisë personale

Elon Musk së fundmi ka thyer edhe rekordin botëror për humbjen më të madhe të pasurisë personale në histori.

Të paktën kështu rezulton nga një raport i rekordeve botërore “Guinness”.

Miliarderi duket se ka humbur afërsisht 182 miliardë dollarë që nga nëntori i vitit 2021, megjithëse burime të tjera sugjerojnë se shifra mund të jetë më afër 200 miliardë dollarëve.

“Vlera neto e Musk ra nga një kulm prej 320 miliardë dollarë në 2021-shin në 138 miliardë dollarë që nga janari 2023, kryesisht për shkak të performancës së dobët të aksioneve të Tesla-s”.

Gjithsesi raporti pranon se shifra e saktë është “thuajse e pamundur për t’u konstatuar”.

Po ashtu ka dalluar se humbjet totale të Musk “kapërcejnë shumë” rekordin e mëparshëm prej 58.6 miliardë dollarësh, të vendosur nga investitori japonez i teknologjisë Masayoshi Son në vitin 2000.

Në dhjetor, shefi i Tesla-s humbi pozicionin e tij si personi më i pasur në botë nga Bernard Arnault, shefi ekzekutiv i konglomeratit francez të mallrave luksoze LVMH, i cili zotëron markën e modës Louis Vuitton.

Sakaq, sipas raportit, pjesa më e madhe e pasurisë së Musk është e lidhur në aksionet e Tesla-s, vlera e të cilave ra me 65 për qind në një 2022-sh të trazuar.

Dhe kjo rënie u përshpejtua në tetor pasi Musk bleu platformën Twitter për rreth 44 miliardë dollarë.

Shqetësimet në rritje për dobësimin e kërkesës dhe problemet logjistike kanë penguar dërgesat për prodhuesin më të madh të automjeteve në botë.

“Bazat themelore afatgjata janë jashtëzakonisht të forta. Çmenduria afatshkurtër e tregut është e paparashikueshme”, ka thënë vetë Musk në mbyllje të vitit 2022.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.