Murati pasi i dyfishoi faturat e tatimit në pronë: Secilit tatimpagues t’i falen deri në 100 euro, propozimin po e kundërshton opozita

Ministri i Financave, Hekuran Murati, po kërkon që qytetarëve t’i falen deri në 100 euro të faturës së tatimit në pronë, katër ditë pasi ministria që e drejton vendosi “tinëz” që qytetarëve të ua dyfishojë çmimin e tatimit në pronë.

Përmes një statusi në Facebook ai ka treguar se si mund të jetësohet propozimi i tij.

“85 për qind e tatimpaguesve nuk do të paguanin asgjë për vitin 2023, ata që tashmë kanë paguar, u llogaritet si parapagim për vitin vijues. 10 për qind  të tjerë do të paguanin më pak se 100 euro për vitin 2023”, ka shkruar Murati.

“Pra vetëm top 5 për qind e tatimpaguesve që përfshin edhe bizneset do tu binte të paguanin më tepër se 100 euro për tërë vitin 2023”.

Por, thotë propozimin e tij po e kundërshton opozita e cila sipas tij, kërkon që të kthehet vlerësimi i vjetër, “sepse janë me qindra biznesmenë, ndërtimtarë e tregtarë, ku me vlerësimin që po kërkon opozita, secili do të paguante mijëra euro më pak”.

“Sidomos bizneset ndërtimore, të cilat kanë në pronësi me qindra banesa që i mbajnë pa shitur, në mënyrë që artificialisht të mbajnë çmimet e larta për banesa”.

“Pra, qytetarë të dashur, kushdo që me të vërtetë ka hallin e qytetarëve, e mbështetë propozimin që secilit t’i falen deri në 100 euro nga fatura e tatimit në pronë”. E ata që kanë hallin e biznesmenëve e ndërtimtarëve, e mbështesin propozimin e opozitës që të mos u lehtësohet barra 95%-shit, por të mbrohen ndërtimtarët e tregtarët”.

Si e rriti Ministria e Financave “tinëz” tatimin në pronë

Ndryshe, pa ndonjë analizë se sa rendohet gjendja ekonomike e qytetarëve, pa konsultime me bizneset dhe pa informim paraprak, çmimi për tatimin në prona është dyfishuar.

Për rritjen prej mbi 60 për qind qytetarët u informuan vetëm në momentin kur paguan obligimet e tatimit në pronë.

Në Kosovë përgjegjëse për rritjen e faturimit në prona janë dy institucione: Komunat dhe Ministria e Financave, Punës dhe Transfereve.

Dyfishimi i tatimit të pronave – Ekonomistët thonë se qeveritarët po sillen si “profiterë të krizës së çmimeve”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.