Murati i quan “lajme të rreme” shpenzimet e udhëtimeve: Buxheti kryesor është shpenzuar për forcat e sigurisë

Ministri i Financave, Punës dhe Transfereve, Hekuran Murati, ka reaguar ndaj raportimeve se Qeveria e udhëhequr nga kryeministri Albin Kurti, ka shpenzuar nga viti 2021 e deri në fund të qershor 2024 shumën prej më shumë se 31 milionë euro duke i quajtur “të pavërteta”.

Murati, përmes publikimit të disa grafiteve në rrjetin social ‘Facebook’, ku në foton e parë ka paraqitur shpenzimet e institucioneve publike, kurse në të dytën atë të Qeverisë ka sqaruar se buxheti më i madh i shpenzuar është bërë për trajnimin e forcave të sigurisë së mbrojtjes.

“Në foton e parë e keni nivelin e shpenzimeve për udhëtime zyrtare jashtë vendit, për të gjitha institucionet – Qeveria, Komunat, Kuvendi, institucionet e pavarura etj”.

“Në foton e dytë e keni nivelin e shpenzimeve vetëm për Qeverinë. E ku rritja kryesore vjen si rezultat i dërgimit në trajnime të forcave të sigurisë e mbrojtjes”, ka shkruar Murati.

Sipas dokumentit që ishte publikuar në media thuhej se për vitin 2023, institucionet e vendit për udhëtime zyrtare jashtë vendit, mëditje të udhëtimeve, akomodim dhe për transport kanë shpenzuar 8.7 milionë euro.

Ndërsa bazuar në njëjtin dokument për udhëtime zyrtare brenda vendit, mëditje, akomodim transport, gjatë vitit të kaluar janë shpenzuar mbi 2.8 milionë euro apo rreth 600 mijë euro më shumë se në vitin 2022 dhe mbi 1 milionë euro më shumë se në vitin 2021.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.