Inspektori i Përgjithshëm i Agjencisë Kosovare të Inteligjencës, Kujtim Shala, ishte ftuar të raportonte në Komisionit për Mbikëqyrjen e Agjencisë së Kosovës për Inteligjencë këtë të martë.
Por, seanca dështoi.
Kryetarja e këtij komisioni, deputetja e Partisë Demokratike të Kosovës, Ganimete Musliu, ka thënë për Albanian Post se shkak i dështimit të kësaj seance ishte kuorumi.
“Nuk pati kuorum, gjysma e deputetëve munguan”, tregon Musliu.
“I kërkova falje zotëri Shalës, me shpresë që takimi do të realizohet javën tjetër”, tha ajo.
Ndërkaq Inspektori i Përgjithshëm i AKI-së do të duhej të raportonte për periudhën një vjeçare për tri fushat e kontrollit të brendshëm, kompetencë e inspektorit.
“Ka qenë raport për periudhën një vjeçare, qershor 2022 – qershor 2023. Ku është dashur të raportohet për tri fushat e kontrollit të brendshëm të cilat janë kompetence ligjore e Inspektorit të përgjithshëm të AKI-së”, tregon Musliu për Albanian Post.
Musli ndër të tjera tregon se deputetët që munguan në këtë seancë ishin, Prezent ishin: Luan Aliu nga VV, Vendenis Lahu nga VV, Fridon Lala nga Iniciativa Re Demokratike e Kosovës, Bekë Berisha nga AAK dhe Ardian Kastrati nga PDK.
Përveç vetes, Musliu tregon se prezent në sallë ishin deputeti Salih Zyba nga VV, Arben Gashi nga LDK, Arbër Rexhaj nga VV dhe Gani Krasniqi nga VV.
Përgjegjësia e Inspektorit të Përgjithshëm në AKI
Inspektori i përgjithshëm i raporton drejtpërdrejt Kryeministrit dhe Komisionit mbikëqyrës parlamentar të Agjencisë Kosovare për Inteligjencë.
Ai inspekton aktivitetet e AKI-së dhe është përgjegjësi e tij të ndihmojë drejtorin të jetë informuar në mënyrë të plotë dhe të vazhdueshme për problemet potenciale në aktivitetet e AKI-së, me qëllim të promovimit të ekonomisë, efikasitetit dhe efektivitetit, dhe evitimit të çfarëdo shkeljeje ligjore.
Përgjegjësia e inspektorit të përgjithshëm përfshin auditimet financiare të aktiviteteve të AKI-së. Përveç Drejtorit të AKI-së, rezultatet e këtyre auditimeve do t’i vihen në dispozicion edhe Kryeministrit.
Ai ka përgjegjësi për të mbështetur edhe hetimet e Avokatit të Popullit.
Inspektori i përgjithshëm është përgjegjës për ofrimin e funksionit të kontrollit të brendshëm në AKI duke shqyrtuar aktivitetet e AKI-së, iniciuar inspektime, auditime dhe hetime, hetuar ankesat në lidhje me aktivitetet e AKI-së apo të bëra nga personat në Kosovë.
Inspektori i përgjithshëm i rekomandon Drejtorit të AKI-së veprime korrektuese dhe monitoron progresin e secilit veprim korrektuese të urdhëruar nga drejtori i AKI-së.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
