Ministria e Punëve të Jashtme dhe Diasporës (MPJD), ka konfirmuar se ka pranuar 13 marrëveshjet e përbashkëta Kosovë-Shqipëri, për të cilat kryeministri i Shqipërisë Edi Rama bëri të ditur se i ka nënshkruar të enjten.
Lajmin për Albanian Post e ka konfirmuar zëdhënësja e Ministrisë së Punëve të Jashtme, Qëndresa Fazliu.
“Ju njoftojmë se sot i kemi pranuar 13 marrëveshje nga Ambasada e Shqipërisë në Prishtinë”, ka thënë shkurt Fazliu për AP.
Më 6 korrik, kryeministri i Shqipërisë, Edi Rama ka thënë se janë dorëzuar në ministrinë e Jashtme të Kosovës 13 marrëveshjet e mbledhjes së dy qeverive të firmosura nga pala shqiptare.
Kjo, me “shpresë se pas heqjes së merakut të shprehur publikisht nga KM Kurti për qytetarët e penguar të përfitojnë nga marrëveshjet, do të kemi edhe konfirmimin e takimit me Albinin sot pasdite”.
Rama në Kosovë, takohet me Osmanin e Konjufcën – jo edhe me Kurtin
Sipas kreut të qeverisë me kundërfirmosjen e palës kosovare ato hyjnë në fuqi menjëherë.
Ky vendim ka ardhur pasi Kryeministri i Kosovës, Albin Kurti refuzoi takimin me kreun e qeverisë shqiptare nëse nuk zhvillohet mbledhja e qeverive e cila u anulua në qershor për shkak të situatës në veri.
“Unë jam në kontakt të drejtpërdrejt me kryeministrin e Shqipërisë Edi Rama, dhe e di që do të vijë në Prishtinë në kuadër të turit Ballkanik. Është thënë që ky tur ballkanik ka të bëjë me përgatitjen e radhës të Samitit të Berlinit që do të mbahet në muajin tetor”, pati thënë Kurti.
“Në mënyrë që këto marrëveshjet e dakorduara të mos mbeten në sirtar; unë i kam propozuar kryeministrit Rama që meqë po vjen këtë javë ta mbajmë edhe një mbledhje të përbashkët”, theksoi kryeministri.
Ai në konferencë për media të mërkurën para gazetarëve shtoi se, “i kam kërkuar miqësisht kryeministrit Edi Rama, që meqenëse do të vijë dhe të qëndroj dy ditë e një natë ta mbajmë edhe mbledhjen e Qeverisë”.
Kurti, tutje ka thënë se marrëveshjet që ishte paraparë që t’i nënshkruanin në qershor duhet të nënshkruhen, në rast se jo kjo dëmton vetëm qytetarët.
Pse u anulua mbledhja e dy qeverive?
Kryeministri i Shqipërisë, Edi Rama, në një konferencë për media të mbajtur të martën në mbrëmje më 13 qershor, kur njoftoi anulimin e mbledhjes së përbashkët të dy qeverive Kosovë-Shqipëri, si shkak i këtij hapi të ndërmarrë duke thënë se, “e kam informuar kryeministrin Kurti se në kushtet e agravimit me orë të marrëdhënieve të Kosovës me krejt bashkësinë euro-atlantike, ky takim nuk mund të mbahet në formatin e parashikuar”
Por, kreu i Qeverisë shqiptare nuk donte që të mos takohej fare me Albin Kurtin.
Për shkak të raporteve pothuajse të ngrira ndërmjet Kosovës dhe Bashkimit Evropian pas situatës së tensionuar në Veri, Rama propozoi që të takoheshin në një format më të ngushtë – me ministrat e Punëve të Jashtme dhe të Mbrojtjes.
Por, këtë format takimi kryeministri i Kosovës, Albin Kurti e kishte refuzuar me pretekstin se të tilla takime mund të organizojnë kur të duan, por ideja e mbledhjes së dy qeverive kishte koncept dhe format tjetër.
Kurti: I kam propozuar Ramës që ta mbajmë mbledhjen e qeverive këtë javë
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
