Modric do të mbetet “mbretëror” deri në vitin 2024

Mesfushori veteran i mbretërorëve të Real Madrid-it, Luka Modric do të qëndrojë në klub edhe për një sezon tjetër.

Kjo, pasi rinovoi kontratën e tij deri në qershor 2024, tha të hënën skuadra spanjolle.

Lajmi u bë i ditur nga agjencia franceze “AFP”.

Modric, 37 vjeç, mbetet një lojtar kyç për Madridin dhe vendosi të qëndrojë pavarësisht interesimit të fortë nga Arabia Saudite, duke kërkuar ta rekrutojë atë në fund të kontratës së tij të mëparshme, e cila skadon këtë muaj.

Kroati ndjek Toni Kroos, Dani Ceballos dhe Nacho Fernandez në zgjatjen e kontratës me madrilenët.

“Në 11 sezonet e tij duke mbrojtur fanellën tonë, ai ka luajtur 488 ndeshje dhe ka fituar 23 trofe”, thuhet në një deklaratë të Real Madridit.

Modric ka ngritur në qiell Ligën e Kampionëve pesë herë me Madridin që kur u bashkua në 2012 nga Tottenham, si dhe La Liga në tre raste dhe dy Copa del Rey.

Fituesi i Topit të Artë, i cili mbush 38 vjeç në shtator, do të përballet me konkurrencë të fortë sezonin e ardhshëm në Santiago Bernabeu.

Real Madrid-i nënshkroi me anglezin Jude Bellingham nga Borussia Dortmund për mbi 100 milionë euro më herët në qershor, ndërsa Kroos, Ceballos, Eduardo Camavinga, Aurelien Tchouameni dhe Fede Valverde po përpiqen për një fanellë titullari.

I riu Bellingham tha në prezantimin e tij se mezi priste të mësonte nga Modric dhe Kroos në veçanti.

Modric përfundoi i dyti me Kroacinë në Ligën e Kombeve dhe ende nuk ka njoftuar nëse do të tërhiqet nga futbolli ndërkombëtar, siç u përfol, apo nëse do të vazhdojë deri në Kampionatin Evropian 2024 verën e ardhshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.