Miratohet projektligji për “Regjistrin Kombëtar të të Dënuarve për Krime Seksuale”

Komisioni i Ligjeve ka miratuar të martën e 19 korrikut unanimisht projektligjin për krijimin e një “Regjistri Kombëtar të të Dënuarve për Krime Seksuale”.

Mazhoranca dhe opozita kanë kaluar draftin për krijimin e këtij regjistri në mbledhjen e fundit të Komisionit të Ligjeve.

Deputetja e Lëvizjes Socialiste për Integrim, Erisa Xhixho, si nismëtarja e projektligjit falënderoi kolegët e të dyja palëve në këtë komision.

Të martën e 14 dhjetorit, Komisioni për Sigurinë Kombëtare (KSK) miratoi në parim dy projektligje.

Këto të fundit, i referoheshin krijimit të një regjistri kombëtar – të të dënuarve për krime seksuale dhe autorëve të veprave penale me natyrë seksuale.

Në drejtimin e nënkryetarit Xhemal Qefalija, komisioni mori fillimisht në shqyrtim projektligjin “Për Regjistrin Kombëtar të të Dënuarve për Krime Seksuale”.

Më pas u shqyrtua dhe projektligji “Për krijimin e regjistrit kombëtar të autorëve të veprave penale me natyrë seksuale”.

Pas pyetjeve dhe diskutimeve nga anëtarët, komisioni miratoi në parim të dyja projektligjet.

Xhixho ishte asokohe pjesë e punimeve në cilësinë e propozueses.

Deputetja sqaroi gjatë fjalës së saj se projektligji është përgatitur në bashkëpunim me një ndër organizatat kryesore të shoqërisë civile “CRCA”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.