Kosova

“Ministre shko pi pak ujë” – Deputetët e opozitës e detyrojnë Nagavcin të largohet nga Komisioni për Arsim


Ilustrim

Pas përplasjes në mes të deputetëve të opozitës, posaçërisht të atyre të Partisë Demokratike të Kosovës (PDK), me Ministren e Arsimit, Shkencës, Teknologjisë dhe Inovacionit, Arbërie Nagavci, kjo e fundit e nervozuar e ka lëshuar mbledhjen e Komisionit për Arsim.

Nagavci, në formë demonstrative, është larguar nga mbledhja e komisionit, në momentin kur po debatonte me deputetin e PDK-së, Ardian Kastrati.

Me një ton tejet të lartë, Nagavci, para se të largohej, po u thoshte deputetëve të opozitës se “një ligj që s’e keni bërë vetë në qeveri… 10 vjet nuk e keni bërë një ligj, 5 qeveri s’e kanë bërë kurrë”.

Nga ana tjetër, deputeti Kastrati i tha Ministres Nagavci se “kur vimë ne në qeveri na trego ti, këtu na të tregojmë ty çka ke me bë ti”, derisa ajo u përgjigj duke thënë se “ju kam raportuar dje”, duke iu referuar seancës parlamentare së të enjtes ku u diskutua në lidhje me formimin e një komisioni parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024.

Në momentin kur Nagavci u ngrit për t’u larguar, deputetja e Lidhjes Demokratike të Kosovës (LDK), Vlora Dumoshi, i tha “dil shko pi ujë pak”, duke ironizuar kështu me të për shkak të nervozizmit të saj.

Ndryshe, të enjten Kuvendi i Kosovës, me 61 vota për dhe 4 kundër ka themeluar Komisionin Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024.

Gjatë seancës parlamentare të së enjtes kjo çështje ka dërguar në debat mes pozitës dhe opozitës.

Para deputetëve kërkesën e ka paraqitur fillimisht deputetja e Partisë Demokratike të Kosovës, Floreta Zejnullahu,.

E që më pas mori përgjigje pozitive nga ministrja e Arsimit, Shkencës, Teknologjisë dhe Inovacionit, Arbërie Nagavci, duke thënë se e mirëpret themelimin e Komisionit Hetimor Parlamentar për furnizimin me librat shkollorë.

“Ndonëse, kërkesa e PDK-së për themelimin e këtij Komisionit Hetimor Parlamentar është e bazuar krejtësisht në të pavërteta dhe në pasaktësi. Unë personalisht dhe gjithë kabineti në ministri mezi presim themelimin e këtij Komisionit dhe të flasim për këtë temë”.

Ministrja tutje akuzoi PDK-në për keqpërdorime në të kaluarën.

“Sepse po duhet hetuar të gjitha akuzimet për keqpërdorime që kanë ndodhur ndër vite në kohën kur PDK-ja udhëhiqte me MAShTI-n, po jo vetëm PDK-ja”.

“Përveç gabimeve në legjislacion dhe përmbajtje ka pasur dhe është raportuar në vazhdimësi për keqmenaxhim dhe keqpërdorim të buxhetit ndër vite të procesit të furnizimit të shkollave me libra.  Kemi raportime se në hapësira shkollore ka libra që janë të hedhura gjithandej. Po ashtu kemi tri raportimeve të Zyrës së Auditorit për keqpërdorim të parave”, ka thënë Nagavci.

Këtyre akuzave më pas iu përgjigj deputeti i PDK-së, Bekim Haxhiu, i cili mohoi akuzat e ministres së Arsimit, për keqpërdorim të fondeve për furnizim të librave shkollorë.

Themelohet Komisioni Hetimor për subvencionimin e teksteve dhe mjeteve shkollore

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore