Milanoviç: “Amerika po lufton kundër Rusisë përmes Ukrainës”

Presidenti i Kroacisë, Zoran Milanoviç, duke komentuar vendimin e qeverisë kroate për trajnimin e ushtarëve ukrainas, deklaroi se Shtetet e Bashkuara të Amerikës po bëjnë luftë kundër Rusisë përmes Ukrainës.

“Ne duhet të themi se amerikanët po bëjnë luftë kundër Rusisë përmes të rinjve ukrainas, duhet ta themi këtë”, ka thënë ai, transmeton mediumi kroat ‘Danas.hr’.

“Mes Rusisë dhe Ukrainës, unë jam në anën e Ukrainës, natyrisht”, pohoi ai duke insistuar se “është një luftë midis Amerikës dhe Rusisë”.

Ai theksoi se kur bëhet fjalë për vendime që kanë karakter të sigurisë dhe mbrojtjes, së pari duhet të konsultohen me presidentin e vendit.

“Tani do të shihet se kush është për Rusinë dhe kush për Ukrainën. Unë nuk jam për askënd. Unë jam për Kroacinë”, përfundoi ai.

Ndryshe, Qeveria e Kroacisë miratoi propozim-vendimin për pjesëmarrjen e pjesëtarëve të Forcave të Armatosura të Kroacisë në Misionin e BE-së, EUMAM Ukraine.

Deri në 80 pjesëtarë të forcave të armatosura të Kroacisë do të marrin pjesë në këtë mision, dhe deri në njëqind pjesëtarë të forcave të armatosura të Ukrainës mund ta kalojnë kufirin e Kroacisë dhe të hyjnë në territorin kroat në dy vitet e ardhshme.

Ky propozim do të shkojë në Kuvendin e Kroacisë për miratim.

Kujtojmë se presidenti Zoran Milanoviç refuzoi të jepte pëlqimin për trajnimin e ushtarëve ukrainas në Kroaci, por ministri Mario Banožić po llogarit në mbështetjen e shumicës prej dy të tretave në Parlament.

Gjithashtu, zyra e presidentit kroat, përmes një komunikate bëri të ditur se ka refuzuar kërkesën e Ministrisë së Mbrojtjes për pjesëmarrjen e pjesëtarëve të Forcave të Armatosura të Kroacisë në Misionin e Bashkimit Evropian, EUMAM Ukraine.

Duke iu referuar Kushtetutës së Kroacisë, Milanoviç vlerësoi se nuk janë plotësuar kushtet për të marrë në konsideratë shkresën e ministrit të Mbrojtjes, me qëllim marrjen e vendimit për dhënien ose mosdhënien e pëlqimit.

Milanoviç kishte deklaruar edhe më parë se nuk do ta mbështesë Misionin EUMAM Ukraine, sepse siç vlerësonte ai, “do të nënkuptonte përfshirjen e Kroacisë në luftë”.

Ai mohoi se ishte në dijeni që ministrat e jashtëm evropianë kishin dhënë idenë për të trajnuar 15 mijë ushtarë ukrainas në Evropë.

“Unë nuk e mbështes atë ide sepse nuk e mbështes përfshirjen e Kroacisë në këtë luftë më shumë se sa duhet. Kjo po e sjell luftën në Kroaci”, kishte alarmuar presidenti kroat.

Këshilli i Bashkimit Evropian, të hënën e 17 tetorit miratoi një vendim për krijimin e Misionit të Ndihmës Ushtarake të Bashkimit Evropian në Ukrainë (EUMAM Ukraine).

Në përgjigje të kërkesës së Ukrainës për mbështetje ushtarake, misioni do të sigurojë trajnime individuale, kolektive dhe të specializuara të Forcave të Armatosura.

Misioni EUMAM Ukraine do të operojë në territorin e shteteve anëtare të BE-së dhe do të ketë një Shtabi Operacional në Bruksel për të siguruar koordinimin e përgjithshëm në nivel strategjik.

Komandanti i misionit do të jetë zëvendës-admirali Hervé Blejean, drejtor i Forcës së Planifikimit dhe Operacionit Ushtarak (MPCC).

Mandati i misionit fillimisht do të zgjasë dy vjet, dhe referenca financiare për shpenzimet totale për këtë periudhë do të jetë 106 milionë e 700 mijë euro.

Këshilli i BE-së miratoi gjithashtu dhënien e 500 milionë eurove të tjera në kuadër të Fondit Evropian të Paqes për të mbështetur më tej aftësitë dhe stabilitetin e Forcave të Armatosura të Ukrainës.

Kësti i gjashtë do të sjellë kontributin total të BE-së në fondin për Ukrainën në 3.1 miliardë euro.

Milanoviç refuzon që Kroacia t’i trajnojë ushtarët ukrainas, referohet në Kushtetutë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.