Mickoski merr mandatin për formimin e Qeverisë së re të Maqedonisë së Veriut

Hristjan Mickoski, lideri i VMRO-DPMNE-së, ka marrë të enjten mandatin nga Presidentja e Maqedonisë së Veriut, Gordana Siljanovska Dakova, për të formuar qeverinë e re maqedonase, në cilësinë e fituesit të zgjedhjeve parlamentare të 8 majit.

Siljanovska Davkova, duke iu referuar afateve kushtetuese dhe faktit se Kryetari i Kuvendit Afrim Gashi është zgjedhur me 76 vota, shprehu bindjen se Mickoski mund të formojë qeveri dhe për këtë ia besoi atij mandatin.

Pas kësaj, nis afati njëzetditor (20), për formimin e Qeverisë së Maqedonisë së Veriut. Mirëpo, Mickoski është shprehur i bindur se ekzekutivi që ai do të drejtojë do të formohet para afatit përfundimtar.

Qeveria e re maqedonase do të përbëhet nga VMRO-DPMNE-ja si bartëse e ekzekutivit –e cila, përvec kryeministrit, do ketë numrin më të ministrive – koalicioni i disa partive shqiptare “VLEN”, dhe Lëvizja “ZNAM”.

Shqiptarët në Maqedoni të Veriut, si komuniteti i dytë më i madh në vend, pas maqedonasve, në çdo qeveri kanë udhëhequr me numër të konsiderueshëm të dikastereve qeveritare.

Kulmi ka qenë në qeverinë që Dimitar Kovaçevski-t, ku gjysma e ministrive udhëhiqeshin nga shqiptarët, përfshirë zëvendëskryeministrin e parë dhe Ministrinë e Punëve të Jashtme.

Si rezultat i marrëveshjes politike në mes të LSDM-së së Dimitar Kovaçevski-t dhe Bashkimit Demokratik për Integrim (BDI) të Ali Ahmetit, shqiptarët që nga janari janë duke udhëhequr edhe kryeministrinë. Në këtë pozitë është Talat Xhaferi, i cili shumë shpejt do zëvendësohet nga Mickoski.

Ndërsa, që dy mandate radhazi, shqiptarët kanë edhe pozitën e Kryetarit të Kuvendit të Maqedonisë së Veriut. Edhe në këtë pozitë, si i pari shqiptar, ka qenë për dy mandate radhazi Xhaferi.

Kjo traditë nuk u prish as me koalicionin VLEN-VMRO. Shqiptarët përsëri e morë udhëheqjen e kuvendit. Afrim Gashi është zgjedhur në këtë pozitë.

Por, ajo çka bie në sy në marrëveshjen e VLEN-it dhe VMRO-DPMNE-së është numri i vogël i ministrive që u është dhënë shqiptarëve, vetëm 4.

Qeveria e re e Maqedonisë së Veriut po krijohet pas zgjedhjeve parlamentare të 8 majit, në të cilat në kampin maqedonas fitoi bindshëm VMRO, me plotë 58 deputetë, ndërsa te shqiptarët fitore korri “Fronti Evropian”, me 18 mandate, apo 4 më shumë se “VLEN”-i.

Por, përkundër kësaj, VMRO-ja ka përzgjedhur “VLEN”-in që të bëjë koalicion, duke anashkaluar kështu parimin fituesi me fituesin (te shqiptarët dhe te maqedonasit).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.