Presidenti i Republikës së Shqipërisë, Ilir Meta, ka dekretuar të hënën e 14 shkurtit emrin e Gent Sejkos për t’u rizgjedhur në pozicionin e Guvernatorit të Bankës së Shqipërisë, të cilin e mban aktualisht që prej 2015-ës.
“Vlerësojmë politikën e Bankës së Shqipërisë, që ka qenë akomoduese për të ofruar mbështetjen e nevojshme për rimëkëmbjen ekonomike, si pasojë e tërmetit dhe pandemisë, si dhe për të lehtësuar konsolidimin fiskal. Gjithashtu është për t’u nënvizuar roli i Bankës së Shqipërisë për të siguruar, që sektori financiar të mbetet i qëndrueshëm dhe likuid”, shkruhet në deklaratë.
Gjithashtu, sipas presidentit, Banka e Shqipërisë duhet të vazhdojë t’i monitorojë nga afër zhvillimet e inflacionit dhe të rregullojë qëndrimin e politikës në përputhje me objektivin e saj për ruajtjen e stabilitetit të çmimeve.
“Rreziku i rritjes së kredive me probleme shton rëndësinë e një monitorimi të ngushtë të cilësisë së portofolit të kredisë së bankave, ruajtjen e rezervave të kapitalit dhe forcimin e kornizave të zgjidhjes së kredive të këqija”.
Meta thekson se të gjithë aktorët duhet të bëjnë përpjekje të përbashkëta për të monitoruar dhe menaxhuar më mirë rreziqet fiskale në rritje që lidhen me rritjen e borxhit publik dhe të ekspozimit ndaj rritjes së portofolit të projekteve të Partneritetit Publik Privat.
Gent Sejko u zgjodh në pozicionin e Guvernatorit nga Kuvendi i Shqipërisë më datë 5 shkurt 2015, bazuar në Dekretin e Presidentit të Republikës së Shqipërisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
