Mero Baze: Viktima e madhe në Veri është humbja e SHBA-ve si aleat strategjik i Kosovës

Për gazetarin shqiptar Mero Baze në veri të Kosovës “nuk janë plagosur thjesht disa dhjetëra ushtarë të KFOR, nga gangsterë serb”.

Ai shkruan në editorialin e tij se “ky do ishte një bilanc fatlum për Kosovën, sikur aty të ishte betejë mes KFOR dhe bandave serbe”.

“Në Veri të Kosovës, viktima e parë e madhe është avokatia e SHBA-ve për Kosovën. Çdokush që përpiqet të duket ‘patriot’ e të shikojë problemin tek pasojat duke harruar shkakun, në fakt bën me mjete paqësore, atë që po bëjnë me dhunë banditët serb”, shkruan fillimisht sipërmarrësi mediatik.

Sipas tij, Kosova dhe bota shqiptare kanë humbur në atë “konflikt idiot”, e shkaktuar me vetëdije prej Albin Kurtit, mbështetjen e SHBA-ve, shtetit që ktheu ëndrrën e miliona shqiptarëve në shekuj, në realitet, duke themeluar shtetin e Kosovës.

Ai kujton se Jeffrey Hovenier, ambasadori amerikan në Kosovë, konfirmoi sot me dhimbje se SHBA-të ndaloi Kosovën të marrë pjesë në stërvitjen e përbashkët “Defender23”.

Ky i fundit, ishte një akt i madh certifikues për ushtrinë e Kosovës dhe ka paralajmëruar pasivitetin e saj ndaj procesit të njohjes së mëtejshme të Kosovës, duke theksuar dhe pesimizmin që ekziston në Washington rreth Kosovës, vëren më tej Baze.

Gazetari sqaron se në Kosovë nuk ka një reflektim serioz për të.

“Albin Kurti gati-gati ngjan i kënaqur që tani është viktimë e Perëndimit, edhe pse përballë bandave serbe, u plagosën ushtarë të KFOR që mbrojtën policinë e Kosovës, dhe jo ‘trimat e diasporës’ së Albin Kurtit, që fluturojnë me presh në bythë, nga gëzimi që Albin Kurti më në fund po lufton dhe me Perëndimin”, akuzon sipërmarrësi mediatik në editorialin e tij.

Baze nënvizon mes rreshtash se të gjithë ata që i kërkuan SHBA-ve të rrijë neutrale në Kosovë, “tani mund të jenë të kënaqur”.

“Tani SHBA-të po përpiqen të mos ndërhyjnë më në punët e Kosovës, duke e braktisur atë për shkak të Albin Kurtit. Ata ish- diplomatët tanë që kishin merak se SHBA po humbiste neutralitetin, tani le t’i dalin zot Kosovës, ta përfshijnë prapë në stërvitjen e përbashkët ushtarake me NATO dhe SHBA-të, të ndihmojnë në njohjen e Kosovës dhe më tej akoma, ta ndihmojnë nëse bllokohet procesi i liberalizmit të vizave dhe axhenda evropiane e Kosovës”, përshkruan gazetari shqiptar.

Të gjithë ata që duan të zhvendosin debatin, sipas tij, tek dhuna e banditëve serbë në Veri ndaj KFOR, sot duan të fshehin “të vërtetën e hidhur”.

“Po vritet e ardhmja perëndimore e Kosovës, e cila në fakt është e vetmja e ardhme e saj”, paralajmëron Baze.

Për të, sot edhe Albin Kurti, edhe Rusia, edhe më pak Vuçiç-i, kanë probleme me SHBA-të, në vend që Kosova të ishte në anën e SHBA-të dhe Perëndimit, kundër tyre.

“Kosova thjesht duhet të rikthehet në shtëpinë e saj perëndimore, duke ia hequr Albin Kurtit nga duart shtetin me të cilin po luan me zjarrin. Askush nuk ja mohon të drejtën të vazhdojë sherret me Rusinë e Serbinë si pjesë e një aleance me armiq të përbashkët Perëndimin, por Kosova duhet të dalë përtej këtij gardhi që ai i ka vendosur, për interesa personale”, shkruan në përmbyllje Mero Baze.

Ai ravijëzon se SHBA-të mund ta mbrojnë Kosovën nga Serbia dhe Rusia, por “nuk mund të mbrojë edhe Albin Kurtin nga Perëndimi”.

“Që Albin Kurti të mos e marrë me vete Kosovën, duhet që Kosova ta ndajë fatin e saj, prej tij”, mendon gazetari shqiptar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.