Mel Stride ngatërron Shqipërinë me Rumaninë teksa mbron planin e qeverisë britanike

Mel Stride ka thënë një gafë. Ose dy.

Sekretari britanik i Punës u skuq pasi ngatërroi dy herë Shqipërinë me Rumaninë teksa po fliste në radio.

Ministri i kabinetit e bëri gafën teksa mbrojti planin e qeverisë për Ruandën në programin “Today” të BBC Radio Four.

Sipas gazetarit, Rishi Sunak ishte në rrugën e duhur për të thyer premtimin e tij për të ndaluar varkat e vogla që transportonin emigrantë përtej Kanalit nga Franca.

Por Stride iu përgjigj duke i thënë se “numrat nuk janë më në rënie në krahasim me vitin e kaluar…gjashtë muajt e parë të këtij viti janë tashmë të njëjtë me vitin 2022”.

Sipas tij, qeveria kishte një sërë politikash për ta ndihmuar atë të arrinte objektivin e saj.

“Për shembull, ne kemi pasur një marrëveshje me Rumaninë, çka nënkupto se duke i kthyer njerëzit menjëherë në Rumani, numri i rumunëve që vijnë këtu ka rënë”.

Por gazetari e pyeti nëse e kishte fjalën për Shqipërinë, dhe jo për Rumaninë siç pretendonte ai.

“E ke fjalën për Shqipërinë?”

“Më falni, e kam fjalën për Shqipërinë – ju kërkoj falje”.

Por nuk mbaroi e gjitha me kaq.

Gjatë intervistës, Stride iu referua përsëri “marrëveshjes së Rumanisë” përpara se të duhej të korrigjohej përsëri.

Ai po përpiqej t’i referohej një marrëveshjeje që Mbretëria e Bashkuar ka arritur me Shqipërinë, e cila parashikon që emigrantët të kthehen në atë vend nëse arrijnë në Britani.

Diku tjetër gjatë intervistës, Stride këmbënguli se kryeministri do të mbajë premtimin e tij nëse miratohet Projektligji i Migracionit të Paligjshëm dhe Gjykata e Lartë vendos që politika e dërgimit të azilkërkuesve në Ruandë është e ligjshme.

“Këto gjëra do të kërkojnë kohë, por nëse mund t’i ndalojmë varkat dhe mund të vendosim marrëveshjet tona me Ruandën përmes Gjykatës së Lartë, atëherë mund të bëjmë përparim të vërtetë dhe të qartë dhe kjo është ajo që kjo qeveri është absolutisht e vendosur të bëjë”, ka thënë ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.