Më shumë se 150 afganë të bllokuar në Shqipëri prej “dokumentacionit kanadez”

Në fillim u paralajmërua si një fitore.

Në tetor të vitit 2021, FIFA, organi qeverisës ndërkombëtar i futbollit, po festonte se kishte ndihmuar më shumë se 150 njerëz të largoheshin nga Afganistani i kontrolluar nga Talibanët.

Organizata priste që i gjithë grupi, i cili përfshinte atletë dhe avokatë të të drejtave të njeriut, së shpejti do të zhvendosej në Kanada.

Kjo, sepse ata kishin marrë dokumente kanadeze udhëtimi.

Dokumentet kishin ardhur nga zyra e senatores Marilou McPhedran.

Por ndërsa ndihma e McPhedran i mundësoi grupit të largohej nga Afganistani, ata tani nuk janë në gjendje të bëjnë udhëtimin ndër-atlantik për në Kanada, sepse qeveria federale thotë se dokumentet janë jo-autentike dhe të pavlefshme.

Lajmi u bë i ditur nga e përditshmja kanadeze “The Globe and Mail”, duke cituar një burim të afërt me këtë çështje.

Ai tha se 163 afganë të lidhur me FIFA-n, të ndaluar të hyjnë në Kanada, kanë kaluar një vit e gjysmë të kaluar të bllokuar në një hotel shqiptar.

Burimi i botimit kanadez dhe katër të tjerë thanë se zyra e McPhedran ia dërgoi dokumentet, të quajtura letra lehtësuese, FIFA-s, e cila më pas ua shpërndau afganëve.

Letrat, të cilat përfshinin emrat e afganëve, dukej se autorizonin hyrjen e tyre në Kanada.

Një nga burimet, një zyrtar i lartë federal, tha për “The Globe” se gjithsej 228 afganë të lidhur me FIFA-n i morën letrat nga zyra e McPhedran-it.

Ata afganë janë tani pjesë e dy rasteve të vazhdueshme të Gjykatës Federale, në të cilat ata po përpiqen të detyrojnë qeverinë të respektojë dokumentet dhe t’u lejojë atyre hyrjen në Kanada.

Zyrtari i lartë tha se asnjë nga ata afganë nuk bëri aplikime zyrtare për të ardhur në Kanada sipas programeve të veçanta të imigracionit të qeverisë për refugjatët afganë.

Gjatë evakuimit të Afganistanit, qeveria kanadeze përdori letra autentike lehtësuese për të ndihmuar njerëzit të arratiseshin, por dokumentet nuk u lëshuan nga zyrat e senatorëve.

Letrat e vërteta, ka thënë më parë qeveria për “The Globe”, janë lëshuar drejtpërdrejt ose nga Departamenti Federal i Emigracionit ose nga Çështjet Globale të Kanadasë.

Në shtator, The Globe raportoi për herë të parë për një grup tjetër afganësh që kishin marrë letra ndihmëse nga zyra e McPhedran. Asokohe, qeveria tha se ato dokumente ishin jo-autentike dhe se çështja ishte referuar në polici.

McPhedran ka pohuar se ajo dhe zyra e saj i kanë dërguar letrat me mirëbesim, me qëllim që të ndihmojnë afganët, jeta e të cilëve ishte në rrezik.

Ajo ka thënë se zyra e saj ka marrë një model për dokumentet nga George Young, i cili ishte shef i shtabit të ministrit të mbrojtjes në atë kohë, Harjit Sajjan.

Në një dosje gjyqësore, McPhedran tha se zyra e saj ndihmoi në lëshimin e 640 letrave të tilla.

Zyra e zonjës McPhedran dërgoi dokumentet në një kohë krize akute në Afganistan.

Kanadaja dhe aleatët e tjerë të NATO-s kishin dështuar kryesisht në përpjekjet e tyre për të shpëtuar afganët të cilëve u ishte premtuar azil, pasi regjimi brutal fundamentalist i talibanëve mori vendin në gusht 2021.

Në atë kohë, FIFA ishte nën presion të jashtëzakonshëm publik për të ndihmuar në shpëtimin e atleteve femra, sepse ato ishin në rrezik të persekutimit të talibanëve.

Një burim tha se situata për afganët në Shqipëri ka qenë e vështirë, pasi grupi përballet me një të ardhme të pasigurt.

Një zëdhënës i FIFA-s tha për The Globe se hoteli është “transformuar në një qendër për refugjatët afganë”.

Shoqata globale e futbollit ka mbuluar kostot e pritjes së atletëve, personave të lidhur dhe mbrojtësve të të drejtave të njeriut që nga mbërritja e parë e grupit në nëntor 2021.

FIFA po paguan për akomodimin, ushqimin, shërbimet e kujdesit shëndetësor dhe sigurinë.

Grupi po merr gjithashtu mbështetje këshillimi, mësime në anglisht dhe një pagë mujore prej 50 dollarë amerikanë për çdo person.

Zëdhënësi tha se shkollimi, çerdhet dhe kujdesi tjetër për fëmijët në grup trajtohen përmes UNICEF-it dhe Save the Children, dhe se grupit po i ofrohet mbështetje ligjore për të siguruar vendbanim të përhershëm.

Qeveria shqiptare vendosi më herët të zgjasë afatin e mbrojtjes për refugjatët afganë në vend deri më 24 gusht.

Pasi talibanët rimorën kontrollin e Afganistanit gushtin e kaluar, Shqipëria pranoi të presë mijëra refugjatë afganë për të paktën një vit.

Kjo, ndërkohë që ata po kontrolloheshin për viza për në SHBA, ku do të kalonin për zgjidhjen përfundimtare.

Vitin e kaluar, Qeveria shqiptare njoftoi se të evakuuarit mund të qëndrojnë më shumë se një vit nëse vizat e tyre amerikane vonohen.

Edhe pse disa mendonin asokohe se Shqipëria kishte për detyrë të ndihmonte aleatin e saj në NATO, të tjerë mendonin se vendi po luftonte mjaftueshëm.

Sipas “Associated Press”, duke cituar Ministrinë e Jashtme shqiptare, 900 refugjatë afganë mbeten në Shqipëri.

Ata që nuk janë më në Shqipëri tashmë kanë arritur të shkojnë në SHBA dhe Kanada.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.