Më 28 gusht 2014, në Berlin, gjashtë krerë të vendeve të Ballkanit Perëndimor do të thirreshin nga kancelarja e Gjermanisë, Angela Merkel, në një kohë krize të refugjatëve sirianë në Evropë.
Qëllimi i saj, ndryshe nga i gjithë diskursi evropian, i cili ishte për një ndalim të zgjerimit të Bashkimit Evropian, do të ishte fillimi i një procesi krejt të ndryshëm të zgjerimit të unionit, me vendet e Ballkanit Perëndimor, ku së pari, konfliktet e brendshme dekadente duhet të zgjidheshin.
Shtatë vjet më pas, në udhëtimin e saj të fundit si kancelare, Merkel, nga Tirana e cilësoi të përmbushur misionin e saj, me rrugën në vijim të shtruar për vendet e Ballkanit Perëndimor, të cilët duhet të vijojnë bisedimet mes tyre.
Ndërsa BE-ja, për Merkelin, nuk duhet të vendosë më kushte, pasi ato janë plotësuar.
Retorika e kancelares u përqendrua në tri pika thelbësore: Procesi i Berlinit, Open Balkan dhe hapja e negociatave për Shqipërinë dhe Maqedoninë e Veriut.
Ndërsa për shumë Berlini përshkruhet si eksperiment i dështuar, për kancelaren, ai është i pazëvendësueshëm. Kjo, pasi mbetet rruga themelore për të shkuar drejt zgjerimit evropian me Ballkanin Perëndimor.
Konceptin “Open Balkan”, Merkel e përshkroi si plotësues të vizionit të saj.
“Sa më shumë të bashkëpunojmë, aq më mirë dhe aq më i fuqishëm do të jetë Procesi i Berlinit”, tha kancelarja në largim.
Ndërsa mbi implementimin e katër lirive themelore të BE-së brenda Ballkanit Perëndimor, ajo shpjegoi se duhen konsoliduar në mënyrë të vazhdueshme.
Vetë procesi, ka ndihmuar shumë, sipas Merkelit, në raportet mes liderëve ballkanikë.
Shumë ka ndryshuar sipas saj, që prej ardhjes së parë në Shqipëri në vitin 2015. Takimet e vazhdueshme dhe normale të krerëve të qeverive janë ndër gjërat më të rëndësishme.
“Kthesa e Ballkanit, falë Merkelit”
“Uroj që kushdo ta marrë stafetën në Berlin, të mos i kthejë kurrizin rajonit. Por, sido të shkojnë punët atje, Ballkani e ka marrë kthesën”.
Ky ishte përfundimi i kryeministrit të Shqipërisë, Edi Rama, pas përfundimit të takimit me kancelaren gjermane dhe bisedës së zhvilluar mes saj dhe gjashtë liderëve të Ballkanit Perëndimor.
Rama kujtoi se kur janë ftuar në 2014-ën, ishte hera e parë në historinë e këtij rajoni, që liderët uleshin “jo për t’u vrarë, jo për të folur për të shkuarën, por për të diskutuar mbi të ardhmen”.
Ndaj, për këtë fakt, iniciativa e kancelares nën siglën e “Procesit të Berlinit”, për kreun e Qeverisë shqiptare ishte e suksesshme.
Pavarësisht faktit se ai mund të jetë i ngadaltë, frytet e para i ka dhënë.
Ndërsa nismën “Open Balkan”, Rama e ka cilësuar si pjellë të drejtpërdrejtë të “Procesit të Berlinit”.
Ai nuk kurseu as fjalët për figurën e Merkelit, e cila për të, është e vetmja ndër krerët e lartë evropianë, që e ka kuptuar plotësisht rajonin e Ballkanit.
“Askush nuk ka bërë për këtë rajon sa kancelarja, pas përfundimit të luftës”, theksoi ai. Rama, vijoi me faktin se kancelarja dhe Gjermania janë aleatë dhe miq që kanë bërë shumë për Shqipërinë.
Mosbesim apo konspiracion?
Debatin në distancë me kryeministrin e Kosovës, Albin Kurti, mbi “Open Balkan”, Rama e vijoi gjatë konferencës me Merkel-in.
Kurti ka qenë ndër zërat më kundër kësaj nisme. Ndërsa, Rama, e cilësoi për të disatën herë, si një konspiracion qëndrimin e kreut të Qeverisë së Kosovës për “Ballkanin e Hapur”.
Këtë mendim nuk e ndan Kurti. Ai theksoi se nuk e kupton se çfarë nënkupton Rama me konspiracione.
Ndërsa derën e Kosovës ndaj nismës, e ka mbyllur sërish, tërësisht.
“Nuk është në interes të Kosovës”. Ky është arsyetimi dhe qëndrimi i Kurtit.
Gjithsesi, ai qëndrimin mbi bashkëpunimet me vendet e tjera, do ta vijojë.
Marrëveshjet e para do të nënshkruhen me Maqedoninë e Veriut. Sapo të formohet Qeveria e re e Shqipërisë, do të ketë bisedime dypalëshe për marrëveshje të reja mes të dy vendeve.
Por, shqetësim thelbësor për Kurtin, mbetet mosbesimi që ai ka për “Open Balkan”. Kjo, sipas tij, sepse brenda nuk është Bashkimi Evropian.
“BE-ja duhet të jetë aty. Dallimi në mes procesit të Berlinit dhe “Open Balkan” është se në të dytën nuk e kemi BE-në”, ravijëzoi Kurti.
Lamtumirë dhe mirupafshim
Me përmbylljen e vizitës së saj në Tiranë, kancelarja Merkel përmbyll edhe vizitën e saj të fundit në postin më të lartë gjerman.
Për Merkelin, kjo vizitë do të jetë një lamtumirë nga karriera politike. Por, me Shqipërinë, kjo mund të jetë vetëm një mirupafshim.
Falë kontributit të kancelares në 16 vjet, dyert e vendeve ballkanike janë plotësisht të hapura për të. Mbi të gjitha, dyert e Shqipërisë.
Jo veç një herë, kryeministri Rama e vuri në dukje ftesën e hapur, që kancelarja pas tërheqjes të zhvillojë vizita në Shqipëri. Vizita, të cilat Merkeli nuk i mohoi se mund të ketë.
Me në dorë titullin Kordoni i Madh me Yll të Medaljes së Kryeministrit për Mirënjohje Publike, të dhuruar për të nga Rama, Merkel mbetet e mirëseardhur në vendin e shqiponjave.
Ndonëse jo më si kancelare, por si mike e shqiptarëve.
Vizita e saj mbyll një kapitull me shumë rëndësi në politikën evropiane. Një kapitull të dominuar nga figura e saj, e përshfaqur në raste të shumta e në çaste të shumta me rëndësi për Evropën.
Rolin, doemos, do ta marrë dikush tjetër sipas saj.
Por, siç e ripërkufizoi Rama përpara largimit të kancelares, “Merkel është një dhe e vetme”.
Ndërsa, fjala tashmë, u kalon vendeve të Ballkanit Perëndimor, për të vijuar atë çfarë ajo ngjizi më 28 gusht 2014.
/Albanianpost.com
