Sport

Mbrojtësi i Crystal Palace kërcënohet me vdekje nga tifozët e Liverpool-it


Futbollisti i Crystal Palace, Joachim Andersen, ka marrë mesazhe kërcënuese nga tifozët e Liverpool-it.

Këta të fundit e kërcënuan me vdekje mbrojtësin danez, pasi ai provokoi sulmuesin e Liverpool-it, Darwin Nunez-in, ku ky i fundit e goditi me kokë atë, çka bëri që të përjashtohet nga loja.

Se është kërcënuar, e ka zbuluar vetë mbrojtësi i Crystal Palace, derisa ka shkruar në profilin e tij në rrjetet sociale.

“Kam marrë ndoshta 400 nga këto mesazhe mbrëmë. Unë e kuptoj që ju mbështesni një ekip, por kini pak respekt dhe ndaloni të veproni si të fortë në internet”, shkruan Andersen.

Sa i përket ndeshjes mes Liverpool-it dhe Crystal Palace, ai përfundoi me rezultat 1:1, ku pa dyshim që ndikoi edhe kartoni i kuq i marrë nga blerja 100 milionë euro e Liverpool-it.

Nunez gjithashtu rrezikon të pezullohet edhe për disa ndeshje për veprimin e bërë në mbrëmjen e së hënës.

Kjo mund të ndikojë edhe te Liverpool-i, të cilët patën një start mjaft të dobët në këtë fillim të kampionatit, duke marrë vetën dy barazime.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore