Një cikël trevjeçar i mbyllur.
Një cikël i mbushur me emocione, sfida dhe ulje-ngritje.
Mbrëmja e maturës, një ngjarje që ngulitet thellë në mendjen e çdo gjimnazisti, pasi përfundon shkollën e mesme, është e një rëndësie të veçantë. Këtë na e rrëfejnë vetë ata.
“Përveç etheve të provimeve, ne impenjohemi shumë, që kjo festë të jetë një ngjarje për të mos u harruar”, thotë Ina Caka për Albanian Post (AP).
“Plot tre vite së bashku. Rrugëtimi ynë i ngjan një familje, ku kalon gjysmën e ditës me shokët e klasës. Ankth, stres për provime, konkurrencë, festa, shoqëri, të gjitha këto i bashkëngjiten një fjale të vetme: gjimnaz”, vijon ajo.
Ina tregon se si ajo, edhe shokët e klasës së saj, po presin me padurim mbrëmjen e maturës, e cila është edhe “simboli i ndarjes me shoqërinë”.
Me përfundimin e provimeve, matura sjell edhe festën e fundit “simbolike” për mbylljen e gjimnazit.
Me shfaqjen e pandemisë, u anuluan shumë festa dhe evente. Asgjë nuk ishte më njëlloj.
A do të organizohen këtë vit mbrëmjet e maturës?
Me lehtësimin e masave nga qeveria, ky vit pritet të jetë ndryshe. Caka dhe shoqëria e saj presin me padurim festën e maturës.
Ajo thotë se “festa e maturës për gjimnazin ‘18 Tetori’ do të organizohet, por me rregulla të reja”.
“Na është thënë”, shpjegon ajo, “që festa do të zhvillohet në ambiente jashtë dhe me distancë nga njëri-tjetri”.
Ndryshe nga vitet e tjera, klasat nuk do të jenë të gjitha së bashku, por “do të festojmë veç e veç”.
Edhe pronari i lokalit, me inicialet B.T. rrëfen për Albanian Post se tashmë maturantët kanë bërë prenotimet, dhe vendosur datat e tyre për të festuar mbrëmjen.
“Festa do të zhvillohet, sipas gjithë rregullave të përcaktuara nga qeveria”, shpjegon ai.
Ai thekson faktin se duhet të merren ende në konsideratë rreziqet shëndetësore të të ftuarave, siguria e tyre dhe udhëzimet nga qeveria.
Edhe në vendet e botës ka pasur ndjeshmëri sa u përket rregullave të reja të Covid-19, në mënyrë që nxënësit të kenë mundësi të festojnë.
“Entuziazëm”
Ina thotë se temë diskutimi e ditës për të dhe shoqet e saj mbetet fustani, detajet e veshjes, për t’u dukur sa më bukur atë natë.
“Kam ëndërruar shumë për këtë natë. Pas provimeve, e vetmja gjë që mendoj është veshja, detajet e saj. Dua të dukem vërtet bukur”.
Fabiola Vula, një tjetër gjimnaziste, thotë se po e pret me pa durim pritjen e mbrëmjes.
“Simboli i mbylljes së periudhës më të bukur në jetë. Kështu thonë të gjithë. Është diçka shumë e veçantë në jetën time. Shoqëria është e shenjtë për mua”, thekson ajo.
Për të dyja gjimnazistet, “ndarja me shoqërinë, meriton një natë fantastike…”.
/Albanianpost.com
