Lajmi është i përditësuar…
Numri i të vdekurve nga tërmetet e javës së kaluar në Turqi dhe Siri ka arritur mbi 41 mijë, ndërsa të plagosurit janë më shumë se 120 mijë.
Autoritetet turke kanë thënë se 35 mijë e 418 persona kanë mbetur të vrarë dhe 105 mijë të tjerë janë plagosur.
Sipas të dhënave nga Kombet e Bashkuara dhe qeveria siriane, më shumë se 5 mijë e 814 njerëz janë vrarë në Siri ndërsa më shumë se 14 mijë janë plagosur.
Ndërkohë më shumë se 8 mijë njerëz janë nxjerrë të gjallë nga rrënojat në Turqi.
Ekipet e shpëtimit ukrainas nxjerrin një grua të gjallë nga rrënojat 8 ditë pas tërmetit në Turqi
Një grua u shpëtua nga rrënojat e një ndërtese në provincën jugore turke të Hatay nga një ekip ukrainas të martën, rreth 205 orë pasi një tërmet shkatërrues goditi rajonin, raportoi CNN Turk.
Shpëtimi i saj e çon numrin e të mbijetuarve të nxjerrë nga rrënojat të martën në shtatë, tetë ditë pas një prej tërmeteve më të këqij në historinë moderne të vendit.
Dëmet nga tërmetet vdekjeprurëse në Turqi ndoshta do të kalojnë 20 miliardë dollarë, sipas kompanisë së modelimit të rrezikut Verisk.
Vetëm një pjesë e dëmeve – me gjasë më shumë se 1 miliard dollarë – mbulohet nga sigurimi, tha Verisk.
Tërmetet janë relativisht të zakonshme në Turqi dhe pavarësisht rregulloreve për të ndërtuar për të mbrojtur kundër tërmeteve, rezultatet kanë qenë “të përziera”, tha Verisk.
Strukturat në përputhje me kodet e ndërtimit “kanë performuar relativisht mirë, ndërsa shumë të tjera kanë përjetuar dëmtime të konsiderueshme dhe shembje gjatë tërmeteve”, tha ai.
Më 6 shkurt 2023, një tërmet i parë me magnitudë 7.8 të shkallës Rihter, i ndjekur nga të paktën dy tërmete të tjera të mëdha, goditi Turqinë dhe Sirinë duke shkaktuar mijëra viktima.
Mijëra ndërtesa kanë pësuar dëmtime serioze, duke përfshirë shkollat dhe objektet e kujdesit shëndetësor dhe infrastrukturë të tjera publike si rrugët, aeroportet, portet, terminalet e naftës, linjat e energjisë elektrike, furnizimin me ujë dhe ujërat e zeza.
Janë regjistruar disa pasgoditje të rënda, të cilat kanë shkaktuar viktima dhe dëme të tjera.
Menjëherë u aktivizua Mekanizmi i Mbrojtjes Civile të Bashkimit Evropian.
20 shtete anëtare të BE-së dhe Shqipëria, Mali i Zi dhe Serbia kanë ofruar tashmë 31 ekipe kërkim-shpëtimi dhe 5 ekipe mjekësore nëpërmjet Mekanizmit të Mbrojtjes Civile të BE-së.
Ekipet përbëhen gjithsej nga mbi 1500 shpëtimtarë dhe 100 qen kërkim-shpëtim.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
