Mazreku: S’ka zgjidhje për Kartonin e Gjelbër derisa Kosova mbetet jashtë OKB-së

Kosova është vendi i vetëm në Evropë që nuk është anëtare e Këshillit të Byrosë Evropiane. Por, statuti i këtij këshilli e specifikon se për të pranuar një shtet, ai duhet të jetë anëtar i Organizatës së Kombeve të Bashkuara (OKB).

E drejtori i Byrosë Kosovare të Sigurimit, Sami Mazreku, ka përsëritur se meqënëse Kosova nuk është anëtare OKB-së, kësaj të fundit i pamundësohet anëtarësimi në sistemin e Kartonit të Gjelbër, ndonëse janë plotësuar kushtet teknike dhe aspektet financiare.

Kartoni i Gjelbër është një certifikatë ndërkombëtare e sigurimit të automjeteve që pranohet nga autoritetet përkatëse, i cili mbulon dëmet personale ose materiale që mund të shkaktohen, në rast të aksidentit në territorin e një shteti tjetër.

Ky karton merret kur sigurohet vetura dhe vlen në të gjitha shtetet që e kanë në përdorim. Në mungesë të tij, qytetarët e Kosovës duhet të paguajnë sigurim në cilindo shtet të huaj, përveç atyre me të cilat Kosova ka marrëveshje reciproke.

Mazreku ka kujtuar edhe njëherë se Kosova ka synuar të bëhet anëtare e sistemit të Kartonit të Gjelbër përmes një shteti tjetër, por nuk ka qenë e mundur për shkak të problemeve politike në vend dhe mungesës së njohjeve ndërkombëtare.

Kosova ka arritur marrëveshjeve dypalëshe mirëkuptimi për njohjen reciproke të policave të sigurimit me katër shtete të Ballkanit Perëndimor: Shqipërinë, Maqedoninë e Veriut, Malin e Zi dhe Serbinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.