Lajme

Matoshi: Projekti për ndërtimin e pendës në Kamenicë është “meritë e imja”


Dy penda për akumulim të ujit të cilat do të përdoren gjatë sezoneve të thata parashihet të ndërtohen në Kosovë – e para nga to është ajo e Firajë-Shtime, si pjesë e rrjetit të Ibër-Lepencit, ndërsa tjetra planifikohet të ndërtohet në Kamenicë për ta siguruar ujin e pijes dhe atë për ujitje.

Ish-ministri i Mjedisit dhe Planifikimit Hapësinor, Fatmir Matoshi, ka folur rreth ndërtimit të pendës në Kamenicë, ndërsa ka thënë se në vitin 2018 i kishte dërguar Bankës Botërore një kërkesë për të vlerësuar mundësitë e investimit në Kosovë.

“Prioriteti im i parë në udhëheqjen e MMPH-së ka qenë ndërmarrja e veprimeve konkrete rreth krijimit të rezervave të reja ujore për Republikën e Kosovës, duke qenë se jemi vendi më i varfër në Evropë për rezerva të ujit”, ka thënë Matoshi.

“Në pjesën e dytë të gushtit 2018, i kam drejtuar një kërkesë Bankës Botërore për të vlerësuar mundësitë e investimit në Kosovë për sektorin e ujërave. Banka Botërore e ka mirëpritur kërkesën time dhe në tetor ka arritur delegacioni i parë për këtë çështje”, ka shtuar ai.

Madje, Matoshi, ka thënë se një projekt i tillë, si ai i ndërtimit të pendës në Kamenicë ka ekzistuar që para katër dekadash, ndërsa ka theksuar se në kohën kur ai po e udhëheqte Ministrinë në fjalë, kishte mbajtur edhe dëgjim publikë për këtë çështje.

Fatmir Matoshi – Ish ministër i Ministrisë së Mjedisit dhe Planifikimit Hapsinor.

“Projekti i Kremenatës ka ekzistuar që nga vitet e 80-ta dhe ka qenë shumë më i avancuar sesa të tjerët, por gjithashtu me kërkesën e Bankës Botërore ne kemi ndarë edhe buxhet për vitin 2019 për hartimin e Planit të Ndikimit Mjedisor e Social për Kremenatën dhe ridizajnimit të projektit”, ka thënë Matoshi në një intervistë për Klan Kosova.

“Gjithashtu kemi mbajtur dëgjimet publike me palët e interesit dhe kemi marrë edhe aprovimet për ndërtime konform të drejtës ndërkombëtare për ujërat edhe nga Serbia dhe Bullgaria ku derdhen këta lumenj”, ka shtuar ai.

Mes tjerash, Matoshi, ka parashikuar edhe koston e këtij ndërtimi, teksa ka thënë se një pjesë e të hollave ishte premtuar të dhurohet në formë donacioni nga Bashkimi Evropian.

“Sipas disa përllogaritjeve të asaj kohe ndërtimi i Hidrosistemit Kikë – Kremenatë duke përfshirë edhe rrjetin kryesor dhe sistemin e ujitjes do të kushtonte rreth 50 milionë euro”, ka thënë ai.

“Nga këto kishim premtimin se 10 milionë do të ishin grant i BE-së. Ndërsa marrëveshja që tani ndodhet për ratifikim ka vlerën e 25 milionë dollarëve për fazën e parë e cila nuk përfshin ndërtimet, por i parasheh në fazën e dytë”, ka përfunduar ai.

Nga këto dy projekte pritet të përfitojnë mbi dhjetë komuna.

/Albanianpost.com


Lajmet kryesore