Lajme

Masat antiCOVID-19/ Policia kufitare identifikon tri raste të falsifikimit të certifikatës së vaksinimit


Policia e Kosovës

Masat antiCOVID-19 të cilat i ka marrë së fundi Qeveria e Republikës së Kosovës për qytetarët që hyjnë në Kosovë, të cilëve u kërkohen tre doza të vaksinave për të mos paraqitur testin negativ, ka bërë që Policia të hetojë edhe falsifikimin e mundshëm të certifikatave të vaksinimit.

Rrjedhimisht më datën 25 janar 2022, gjatë orëve të pasdites Policia Kufitare e Kosovës, konkretisht zyrtarët policor nga Stacioni kufitar Hani Elezit, gjatë realizimit të detyrave dhe autorizimeve ligjore në intervale të ndryshme kohore në linjën hyrëse, kanë hasur në tre raste, ku gjatë kontrollit dhe verifikimit të dokumentacioneve të identifikimit, tre personave të dyshuar iu janë gjetur certifikata të vaksinimit të COVID-19, që dyshohen të jenë të falsifikuara.

Lidhur me rastet është kontaktuar prokurori i shtetit dhe janë iniciuar lëndët për “falsifikim të dokumentit”, për procedim të rregullt të rasteve sipas procedurave të mëtejme ligjore, thuhet në njoftimin e Policisë.

Ndryshe, në lidhje me masën e paraqitjes së dëshmisë për tre doza të vaksinës në pikat kufitare, ka pasur shumë reagime edhe nga shtetet fqinje të Kosovës të cilat kanë kërkuar që e njëjta të hiqet, por reagime ka pasur edhe brenda vendit edhe për masat e tjera sidomos kufizimet e lëvizjes së lirë dhe kufizimet në gastronomi dhe palestra të fitnesit, të cilat janë mbyllur komplet.

/Albanianpost.com


Lajmet kryesore