Rrezik nga rrëmbimet? Një person është futur në oborrin e shtëpisë? Apo janë thjesht disa paparacë që tentojnë të fotografojnë fëmijën e një miliarderi?
Nuk ka tashmë asnjë problem mbi këto çështje. Çdo i pasur mund të punësojë një “Mary Poppins me muskuj”, për t’u kujdesur për fëmijën e tyre – mbi të gjitha për të mos lejuar të ndodhë asnjë skenar nga të lartpërmendurit.
E mes këtyre “super dadove”, është edhe një shqiptare!
Deni Zinxhiria, një zeshkane bukuroshe e lindur në Shqipëri dhe e rritur në Greqi, ishte një truprojë e thjeshtë dhe themeluese e Akademisë Athina. Kjo akademi, trajnonte dadot për të shkuar përtej përkujdesjes së thjeshtë ndaj fëmijës. Pra, për të qenë një lloj James Bond.
“Gratë janë të duhura për këtë punë të dyfishtë”, thotë ajo me vendosmëri në një intervistë për të përditshmen britanike “The Telegraph”. “Ato përshtaten shumë mirë me mjedisin, ndryshe nga burrat. Gjithashtu ato mund të mos bien shumë në sy për çështjen e sigurisë, sepse të tjerët presin që në detyrë të jetë një burrë”.
Zinxhira nuk është një vajzë tipike. Ajo është kujdesur për princesha, fëmijë aktorësh të famshëm dhe djem e vajza miliarderësh. Prej 20 vitesh, ajo zhvillon këtë profesion, të cilët pak e njohin.
“Falë filmave të Hollywood-it, njerëzit mendojnë se truprojat duhet të duken si Arnold Schwarzenegger”, shton ajo. “Por këto janë broçkulla. Unë jam vetëm 165 centimetra e gjatë, mund të quhem edhe e vogël. Por përmasat nuk përbëjnë ndryshim”.
Aftësia e vërtetë sipas Zinxhirës, është të parandalosh sulmet e rrezikshme me anë të qetësisë mendore.
Një dado e rrezikshme
Arabi Saudite, Indi, Los Angeles. Zinxhiria ka qenë kudo në botë për të ushtruar profesionin e saj. Për më tepër, ajo ka mësuar dadot e tjera të jenë “të rrezikshme”.
Mënyra si ajo funksionin tashmë, është nëpërmjet kontraktimit nga persona privatë.
Zinxhiria i nënshtron dadot e fëmijëve në kurse dhjetë ditore. Më së shumti, në to, zhvillohen trajnime mbi përdorimin e forcës fizike dhe asaj mendore.
Një stërvitje intensive, ndodh përgjatë këtij intervali.
Aftësitë kryesore që do të zhvillojnë dadot, janë ato të detektimit të keqbërësve, gjetja e mënyrës si të sigurohen fëmijët, arratisja nga vendet e rrezikshme apo dyluftimi me keqbërësit.
Nëse dikush mendon se vetëm dadot më të forta duhet të aplikojnë, duhet rimenduar gjithçka. Në kursin e Denit, ka vend edhe për fizikët më të dobët.
Sipas saj, gjithë çështja qëdron në gjetjen e balancës midis të qenit dado dhe truprojë. Kjo, duke implikuar anën njerëzore dhe atë fizike.
“Të gjitha dadot, nëse duan të shpëtojnë nga rreziku fëmijët, duhet të jenë instiktive, por me mendje të mbledhur. Nuk mund të tensionohesh në të tilla situata”, argumenton ajo.
Këtu, duke shtuar edhe faktin, se duhet të jenë të ndërgjegjshme për rrezikun që ndërmarrin.
Mbi faktin se pse ka gjetur kaq sukses me biznesin e saj të trajnimit, ajo ka argumentuar fare thjeshtë.
“Të gjithë e dimë se fëmijët janë ata që kontrollojnë çdo detaj të jetës së prindërve. Nëse fëmija është mirë, prindërit janë mirë. Për këtë arsye, ata shpenzojnë sa të munden për sigurinë e tyre”.
Ndërsa adoleshentët janë kategoria më e vështirë për t’u kontrolluar, ajo specifikon kushtet e veçanta dhe premisat, të cilat dadot duhet të ndjekin, për t’i mbrojtur ata, edhe më shumë se fëmijët e vegjël.
“Asnjë nuk të sulmon befas, përveçse nëse është psikopat. Gjithçka ndodh në mënyrë të organizuar. Dadot, kanë në dorë të zbulojnë çdo gjë përpara kohe nëse janë të kujdesshme. Kështu, duke mbrojtur fëmijët nga rreziqet”.
Pra, si të thuash, vetë Deni, është një Mary Poppins me muskuj. Por, një e tillë, që trajnon edhe Mary Poppins të tjera!
/Albanianpost.com
