Rëndësia e marrëdhënieve të mira me publikun, si dhe krijimi i një imazhi pozitiv, është çelësi i suksesit të një kompanie.
Sipas Lorena Licenjit, eksperte e komunikimit, të pasurit një menaxher të marrëdhënieve me publikun në krye të një kompanie (PR), po kthehet në diçka “jetike për çdo biznes edhe në Shqipëri”.
Roli i tyre, shpjegon ajo për Albanian Post, është “krijimi i një imazhi pozitiv të organizatës ose kompanisë”.
“Shpesh”, thotë ajo, “PR identifikohet me figurën e një personi ‘multitaksing’. Ai është aty për gjithçka”.
Edhe drejtoresha e Marrëdhënieve me Publikun në kompaninë “Tibo”, Blerina Kapaj, pohon se roli i saj kryesor është “të përmirësoj imazhin e kësaj kompanie”.
Ndër të tjera, Kapaj thekson se, nëse nuk është një figurë kryesore që merret vetëm me këtë, “me shumë gjasa, kompania s’do të ketë të njëjtin sukses”.
Një rast konkret, për Albanian Post e sjell drejtori i Marrëdhënieve me Publikun në kompaninë Lufra, Kledis Qevini.
“Gjatë punës time u gjenda me një moment të vështirë që më duhej ta menaxhoja në kohë rekord”.
Ai kujton momentin kur u përball me një krizë në kompani, në vitin 2016.
“Në atë kohë ‘Lufra’ u akuzua për përdorim të një reagenti të quajtur ‘Benzoat’, që hidhet mbi normën e lejuar në qumësht dhe rrezikon jetën e konsumatorit”.
Sipas tij, në të tilla raste hasesh me dy grupe konsumatorësh, “ata që besojnë se kjo mund të ndodhë në ‘çdo ushqim’ dhe pjesa tjetër që ua atribuojnë përgjegjësinë firmave”.
Kur kompania ekspozohet ndaj një situate krize, si: ankesat e cilësisë, shkelja e rregullave industriale, vonesat në sigurimin e përgjigjes, siguri e ulët në përdorimin e produkteve, hyj në rol “unë, eksperti që merr masa për të vlerësuar sa afër është kriza”.
Edhe Kapaj thotë se, prej disa vitesh, një numër i konsiderueshëm personash marrin vendimin final për të blerë, nën konsideratat që lidhen me “reputacionin dhe imazhin”.
Ajo shton se: “Që një kompani të ketë sukses, është e nevojshme të përcaktohet audienca e targetuar, objektivat dhe analiza e një situate të caktuar”.
“Pak histori suksesi janë të rastësishme. Sipërmarrjet e suksesshme nisin me plane të mirëpërgatitura dhe vijojnë deri në përmbushjen e tyre, që do të thotë deri atëherë kur objektivat e planeve në fjalë janë përmbushur”, shprehet drejtoresha.
Edhe S.K menaxher i marrëdhënieve me publikun, shpjegon që marrëdhëniet me publikun duhet të jenë të qëndrueshme dhe afatgjata.
Ai tregon për AP-në se marrëdhëniet me publikun njohin dimensione që janë në gjendje të shkojnë përtej përftimeve, të caktuara tregtare.
Roli i PR-it në situatë krizash
Një element tjetër, sipas PR-ve, është edhe afati kohor në menaxhimin e situatës së krizës.
Sipas studiueses Kathleen Fearn-Banks, “Kriza është një ndodhi madhore me rezultate potencialisht negative që prekin organizatën apo kompaninë. Krizat nuk janë gjithmonë të pritshme”.
Qevani jep panoramën sesi ia doli që, brenda një kohe të shkurtër, të mirinformonte klientët për produktin.
“Gjëja e parë që bëra, ishte shfrytëzimi i përvojave të mira të klientëve. Pasi informacioni nuk ishte i vërtetë. Reklamat në rrjete sociale, drejtuar konsumatorëve, ishin të menjëhershme dhe të përcillnin informacionin e saktë”.
Fearn-Banks shpjegon se “shumica e të gjitha krizave shkaktohen nga vendimet e menaxhimit dhe jo nga aksidentet apo fatkeqësitë natyrore”.
Influenca e marrëdhënieve te publiku në çastin e një krize mund të përfshijë reduktimin e saj.
“Ne kërkuam falje publike, për gabimin e ndodhur pa dashur dhe nisëm një fushatë të madhe për të promovuar risitë e produktit. Kishim avantazhin se klientët tanë na besonin”, përmbyll Qevani.
Fitimi i besnikërisë së klientit është një sfidë e madhe për bizneset sot dhe një rrugë vazhdimisht në përmirësim për të siguruar ruajtjen afatgjatë të klientëve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
