Mandati i Stoltenberg në krye të NATO-s mund të zgjatet

Sekretari i Përgjithshëm i NATO-s, Jens Stoltenberg mund të vazhdojë mandatin e tij deri në shtator, në mes të luftës së vazhdueshme të Rusisë kundër Ukrainës.

Lajmi u bë i ditur nga kompania mediatike “Politico”, duke iu referuar diplomatëve evropianë.

Botimi vë në dukje se ekzistojnë paraprakisht tre nivele opsionesh për zhvillimin e ngjarjeve, të cilat renditen sipas intensitetit të bisedave.

Zgjatja e mandatit të Stoltenberg është opsioni më i përmendur.

Niveli i dytë përfshin kryeministrin holandez Mark Rutte, kryeministren estoneze Kaja Kallas dhe sekretarin britanik të mbrojtjes Ben Wallace.

Grupi i tretë i emrave më rrallë të përmendur përfshin kryeministren e Lituanisë Ingrid Šimonite, presidenten e Sllovakisë Zuzana Čaputova dhe kryetaren e Komisionit Evropian Ursula von der Leyen.

Meqenëse të gjithë sekretarët e përgjithshëm të NATO-s deri më tani kanë qenë burra, ka presion brenda NATO-s për të emëruar një grua.

“Është koha për të emëruar një grua sekretare të përgjithshme. Nëse burrat përpiqen të mbajnë postet e tyre përgjithmonë, nuk do të ketë kurrë një shans për përfaqësim të drejtë të grave”, tha një diplomat i lartë i NATO-s.

Disa aleatë po bëjnë presion për diversitet më të madh rajonal.

Stoltenberg, i cili e mban këtë post që nga viti 2014, është një ish-kryeministër i Norvegjisë.

Paraardhësit e tij ishin një danez, një holandez dhe një britanik.

Mandati i sekretarit aktual të përgjithshëm u zgjat marsin e kaluar pas pushtimit rus të Ukrainës.

Shumë zyrtarë tani besojnë se një tjetër zgjatje për Stoltenberg, qoftë edhe për një kohë të shkurtër, është një mundësi serioze.

Edhe pse disa delegacione do të preferonin të shihnin një fytyrë të re në të ardhmen e afërt, Stoltenberg ende shihet si zyrtari i rrallë i rangut të lartë që mund të ruajë gjakftohtësinë e tij – dhe t’i përmbahet skenarit – edhe në krizat më serioze.

Por në rastin e një vendimi për të vazhduar, përzgjedhja e mëvonshme e një Sekretari të Përgjithshëm të ri mund të përkojë me garën për postet më të larta në BE në vitin 2024, për të mos përmendur zgjedhjet e ardhshme presidenciale në SHBA, të cilat disa aleatë do të preferonin t’i shmangnin.

Më herët, mediat raportuan se në vitin 2023, Stoltenberg mund të bëhet kreu i ri i Fondit Monetar Ndërkombëtar vitin e ardhshëm.

Gjithashtu u raportua se zëvendës kryeministrja dhe ministrja e financave e Kanadasë Chrystia Freeland është një nga kandidatët për postin e Sekretarit të Përgjithshëm të NATO-s pas Stoltenberg.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.