Mandati i Konjufcës mund të përfundojë nëse dënohet me vendim gjyqësor të formës së prerë për gazin lotsjellës?

“Pengimi i personit zyrtar gjatë kryerjes së detyrave zyrtare”, është akuza që rëndon mbi kryetarin e Kuvendit të Kosovës, Glauk Konjufca, vepër kjo për të cilën në rast se shpallet fajtor gjatë periudhës sa është kryetar i Kuvendit të Kosovës, e detyron atë të japë dorëheqje nga kjo pozitë.

Aktakuza ndaj Konjufcës ishte ngritur më 3 shkurt të 2017-ës.

Neni 70 i Kushtetutës së Kosovës, në rast se shqiptohet dënim ndaj tij, mund t’i jap fund mandatit të tij si kryetar Kuvendi.

“Mandati i deputetit mbaron ose bëhet i pavlefshëm nëse: nuk bën betimin, jep dorëheqjen, emërohet anëtar i Qeverisë së Kosovës, përfundon mandati i Kuvendit, mungon gjashtë muaj rresht në seancat e Kuvendit. Në raste të veçanta, Kuvendi i Kosovës mund të vendosë ndryshe”.

“Dënohet me vendim gjyqësor të formës së prerë për vepër penale me një ose më shumë vjet burgimit”, thuhet në këtë nen.

Avokati Ardian Bajraktari, në një bisedë për mediumin Albanian Post sqaron se nëse Konjufca dënohet me vendim të prerë sigurisht që mandati i tij si kryetar i Kuvendit do të përfundonte.

“Çështja e mandatit të deputetit në kuadër të së cilës sigurisht që hyn edhe kryetari i Kuvendit, duke qenë se para se gjithash është deputet si çështje e kategorisë kushtetuese në rrjedhë të kësaj është neni 70 i Kushtetutës sonë në paragrafin 3, sipas së cilës përcaktohet se mandati i deputetit mbaron ose bëhet i pavlefshëm nëse i njëjti dënohet në vendim gjyqësor të formës së prerë për veprën penale”, thotë Bajraktari.

Por, ai tregon një pjesë tjetër të kësaj çështje.

Bajraktari, thotë se gjykimi mund të zgjasë më shumë për shkak se palëve u lejohet të parashtrojnë ankesa pas vendimit të Gjykatës Themelore në atë të Apelit.

“Unë kam përshtypjen se pavarësisht epilogut të vendimit gjyqësor në rastin konkret probaliteti është i vogël që të humbet mandati i kësaj legjislature, për faktin sepse edhe nëse kryetari Konjufca dënohet do të jetë vendim vetëm i shkallës së parë, që i bie se pastaj instancat tjera përkatësisht Gjykata e Apelit do të ketë kohën e vetë për rishikimin e çështjes”.

Madje ai e sheh këtë proces si një prej të cilëve që “do të zgjasë më shumë”, duke shtuar se deri në momentin kur Gjykata të merr vendim Konjufca edhe mund “të mos jetë në pozitën e kryetarit”.

Ndërsa nga këndvështrimi i këshilltarit të lartë në Qendrën për Ndihmë Juridike dhe Zhvillim Rajonal, njëherësh edhe jurisiti Anton Nrecaj, vendimi dënues ndaj Konjufcës nuk do e ndalonte ushtrimin e tij në pozitën e kryetarit.

Por, sipas tij, nëse Konjufca do të donte ta ruante integritetin e postit atëherë do të duhej të jepte dorëheqje.

“Ne rastin e zotërit Konjufca, një dënim i tillë do ta zbehte pozitën e Kryetarit të Kuvendit te Kosovës, edhe pse një dënim i tillë nuk e ndalon ushtrimin e pozitës qe ka. Por, nga ana tjetër në botën demokratike në situata të tilla akti moral i dorëheqjes do t’i ruante integritetin postit të Kryetarit te Kuvendit”, thotë Nrecaj për Albanian Post.

Si Bajraktari edhe Nrecaj, pohon se këto janë vetëm seancat e para prandaj epilogu i kësaj ngjarje s’është afër.

“Kjo është vetëm seanca fillestare e këtij procesi gjyqësor, e që po shpresoj që ky proces të merr epilog në shkallë të parë gjatë këtij viti”.

Ai duke u bazuar në dënimet e kaluara që janë shqiptuar për raste të ngjashme tregon se të akuzuarit ose janë “dënuar me kusht” ose me “shqiptime të dënimeve me gjobe”.

Akoma nuk dihet nëse ndaj Konjufcës, do të shqiptohet dënim ngjashëm siç kishte ndodhur me kryeministrin e Kosovës, Albin Kurti në atë kohë deputet dhe ministres Albulena Haxhiu në atë kohë deputete.

Kurti, ishte dënuar me 1 vit e 3 muaj burgim për përdorim të armës apo mjetit të rrezikshëm

Haxhiu për përdorim të armës apo mjetit të rrezikshëm ishte dënuar me 1 vit e 3 muaj burgim, kurse për pengim të personit zyrtar ishte dënuar me 6 muaj, kurse në fund asaj i ishte shqiptuar dënimi unik prej 1 vit e katër muaj burgim me kusht.

2015 dhe 2016 vite të tensioneve në Kuvendin e Kosovës

Në vitin 2015 kishte sulme të vazhdueshme në Kuvendin e Kosovës në atë kohë nga Lëvizja Vetëvendosje që ishte opozitë.

Situata e tensionuar në Kuvendin e Kosovës kishte nisur me 22 shtator të 2015, me sulme me vezë e gaz lotsjellës.

Në kërkim të shfuqizimit të marrëveshjes për ngritjen e Asociacionit të Komunave me Shumicë Serbe.

Në muajin tetor të 2015, në një seancë ku po udhëhiqej nga ish-kryeparlamentari i Kuvendit të Kosovës, Kadri Veseli, seanca plenare ishte ndërprerë pasi që deputetët nga radhët e opozitës LVV kishin hedhur gaz lotsjellës në sallë.

Në atë kohë ky sulm ishte bërë për shkak të marrëveshjeve me Serbinë dhe atë me Malin e Zi për demarkacionin.

Në gusht të 2016, gazi lotsjellës ishte rikthyer sërish në Kuvendin e Kosovës gjatë mbledhjes së Komisionit për Punë të Jashtme, ku ishte duke u shqyrtuar Projektligji për ratifikimin e Marrëveshjes me Malit të Zi.

Nga Opozita ishte paralajmëruar se do të pengohej ratifikimi i marrëveshjes, qoftë edhe me metoda jo të duhura dhe ato radikale, duke mos e përjashtuar mundësinë e përshkallëzimit të gjendjes së sigurisë në Kosovë.

Ndërsa më 24 shkurt të 2016, takimi i Kryesisë së Kuvendit të Kosovës, në të cilin është dashur të vendoset për datën e seancës së jashtëzakonshme për zgjedhjen e presidentit të ri të Kosovës, ishte ndërprerë nga gazi lotësjellës, sërish i hedhur nga opozita.

Si zgjidhje për këtë situatë që vazhdonte gjatë gjithë kohës më 9 mars të 2016, Qeveria e Kosovës, kishte marrë vendim që t’i ndahen mjete financiare Kuvendit për blerjen e skanerëve, të cilët do të detektonin futjen e gjësendeve të ndaluara brenda këtij institucioni.

Vendimi i qeverisë ishte konfirmuar dhe ka pasuar kërkesën e Kryesisë së Kuvendit, sipas së cilës, me këso lloj skanerësh, mund të detektohet dhe parandalohet futja e gazit lotsjellës në Kuvend, por edhe e gjësendeve tjera të ndaluara.

Edhe më 24 mars të 2018, seanca për ratifikimin e demarkacionit ishte zhvilluar nën tensione e masa të shtuara të sigurisë.

LVV, tentoi që të pengojë ratifikimin e demarkacionit përmes hedhjes së gazit lotsjellës.

Ndërprerja e seancës në katër rastet kur ishte provuar të votohet për ratifikimin e demarkacionit, solli si rezultat largimin e deputetëve të Lëvizjes Vetëvendosje në atë kohë nga salla e Kuvendit nga Policia e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.