Manchester City merr përkohësisht kryesimin e Premier League
Romario Ismailaj
13.04.2024 17:54Manchester City është ngjitur përkohësisht në krye të Premier League pas triumfit 5-1 ndaj Luton-it këtë të shtunë në “Etihad”.
Skuadra e Pep Guardiola-s arriti të kalonte me lehtësi miqtë nga Lutoni duke marrë një tripikësh që i ngjit në krye të Premier League, por Arsenal-i dhe Liverpool-i ende nuk i kanë zhvilluar ndeshjet e tyre.
Sfida u hap me autogolin e mbrojtësit të Luton-it, Daki Hashioka në minutën e dytë. Dhe pjesa e parë do të mbyllej me avantazhin e “Qytetarëve”.
Në pjesën e dytë, një gol nga Mateo Kovacic, në minutën e 64, dhe një penallti nga Erling Haaland, në minutën e 76, do t’i jepnin City-t një avantazh të trefishtë.
Megjithatë, miqtë nuk u dorëzuan dhe gjetën golin në minutën e 81 me ish-mesfushorin e Chelsea-t, Ross Barkley.
Por, City do të gjente edhe dy herë të tjera rrjetën pas golit të pësuar. Në minutën e 87 realizoi Jeremy Doku, ndërsa gjashtë minuta më vonë belgu do të asistonte për golin e Josko Gvardiol-it.
Me 73 pikë, City shkon në kyre të Premier League, dy pikë më shumë se Arsenal-i dhe Liverpool-i që gjenden poshtë tyre. “Topçinjtë” dhe të kuqtë do të luajnë të dielën sfidat e javës së 29, respektivisht ndaj Aston Villa dhe Crystal Palace.
Përsa i përketë Luton-it, skuadra gjendet në vendin e 18 me 33 pikë dhe rrezikon rikthimin e shpejtë në Championship.
Paralelisht me takimin Man City – Luton u zhvilluan edhe tre takime të tjera në Premier League:
Brentford 2-0 Sheffield United;
Burnley 1-1 Brighton;
Forest 2-2 Wolves.
Më herët në Premier League, këtë të shtunë, u zhvillua takimi Newcastle 4-0 Tottenham.
Sfida e fundit e ditës në elitën e futbollit anglez do të luhet duke filluar nga ora 18:30 mes Bournemouth dhe Manchester United.