Shqipëria

Manastirliu në Spitalin e Krujës: Situata e qetë, po kryhen hetime mbi helmimin masiv


Ministrja e Shëndetësisë në Shqipëri, Ogerta Manastirliu, ka vizituar pacientët e helmuar në Spitalin e Krujës të martën e 26 tetorit.

“Situata e qetë nuk ka pacientë të rënduar. Po kryhen hetime për shkakun e helmimit”, është shprehur ajo.

Më herët, ka qenë presidenti i Shqipërisë, Ilir Meta, i cili përmes një postimi në median sociale Facebook, ka reaguar lidhur me helmimin e më shumë se 300 banorëve.

“Me shqetësim po përcjell helmimin në masë të banorëve të Krujës, një situatë alarmante, që duhet trajtuar me shumë përgjegjësi dhe seriozitet nga institucionet shtetërore përgjegjëse për shëndetin publik, por edhe nga drejtësia”.

Meta u ka bërë thirrje autoriteteve përkatëse për zbardhjen e burimit që çoi në këtë gjendje.

“I nxis shërbimet shëndetësore epidemiologjike dhe ato të mjekësisë ligjore të zbardhin sa më parë burim shkakun dhe shkaktarët e përgjegjësit e kësaj ngjarjeje të rëndë, që përbën një kërcënim serioz për jetët njerëzore dhe Sigurinë Kombëtare”.

Gjatë ditës së sotme ka pasur një reagim dhe nga drejtoresha e spitalit, Yllka Sheta, mbi gjendjen alarmante të krijuar në Krujë, pas helmimit, për të cilin dyshohet se ka ardhur nga uji i pijshëm.

Sipas saj, në Spital deri më tani janë paraqitur mbi 300 banorë për të marrë ndihmë mjekësore me simptomat e helmimit.

“Nuk ka pasur raste të rënda, që t’i dërgonim për mjekim të specializuar në Tiranë, kanë marrë të gjithë shërbimin këtu”.

Ndër të tjera, Sheta tha se situata mbetet nën kontroll.

Që nga dita e djeshme, në Spitalin e Krujës ka pasur fluks të banorëve, me të njëjtat simptoma diarre dhe të vjella.

Policia e Krujës, të hënën e 25 tetorit, ngriti një grup pune për sqarimin e rrethanave dhe zbardhjen e shkakut.

Nëpërmjet një njoftimi, ajo bëri me dije se janë vënë në dijeni organet e Shëndetit Publik dhe të AKU-së.

Tashmë priten përgjigjet e analizave për ujin që furnizon qytetin e Krujës.

/Albanianpost.com

Lajmet kryesore