Presidenti francez Emanuel Macron ka mbërritur në Tiranë.
Ai do ta nisë vizitën e tij të parë zyrtare në Shqipëri këtë mbrëmje me dorëzimin e dekoratës më të lartë të Republikës së Francës “Oficer i Madh i Legjionit të Nderit” për shkrimtarin e shquar shqiptar, Ismail Kadare.
Këtë, në një ceremoni që do të zhvillohet në orën 20.00 në Pallatin e Brigadave.
Vizita e tij do të zgjasë dy ditë, teksa në fokus të bisedimeve do të jenë marrëdhëniet mes dy vendeve, si edhe mundësitë e bashkëpunimit në fusha të ndryshme.
Vizita e Macron në Shqipëri shënon një ngjarje historike mes Shqipërisë dhe Francës, duke shënjuar vizitën e parë në marrëdhëniet dypalëshe.
Nesër, më 17 tetor, Presidenti francez do të takohet me Presidentin e Republikës së Shqipërisë, Bajram Begaj.
Në orën 08:25 do të jetë mbërritja e Presidentit Macron në Institucionin e Presidentit të Republikës, ku do të kryhet edhe kalimi para truprojës së nderit.
Presidenti i Republikës franceze do të pritet nga Presidenti Begaj.
Dy krerët e shteteve do të prezantojnë ekipet e tyre respektive.
Në orën 08:35 – 09:05 do të mbahet edhe takim kokë më kokë mes dy presidentëve.
Macron ka mbërritur në aeroportin e Rinasit në Tiranë rreth orës 19:30.
Atë e ka pritur zëvendëskryeministrja Belinda Balluku për shkak se kryeministri Edi Rama ndodhej në samitin e Procesit të Berlinit që u mbajt këtë 16 tetor në Tiranë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
