Macron emëron Qeverinë e re, në kurs për nga e djathta

Presidenti francez, Emmanuel Macron emëroi një qeveri të re të udhëhequr nga kryeministri Michel Barnier të shtunën, e shënuar nga një zhvendosje djathtas, 11 javë pas zgjedhjeve parlamentare.

Detyra e parë kryesore për Barnier, i emëruar pak më shumë se dy javë më parë, do të jetë paraqitja e një plani buxhetor për vitin 2025, që trajton situatën financiare të Francës, të cilën kryeministri këtë javë e quajti “shumë serioze”.

Konservatori Barnier është më i njohur ndërkombëtarisht për udhëheqjen e negociatave të Bashkimit Evropian për Brexit me Mbretërinë e Bashkuar.

Kohët e fundit, ai ka pasur punën e vështirë për të paraqitur një kabinet për miratimin e Macron, që ka shanset më të mira për t’i mbijetuar një mocioni mosbesimi në Parlament.

Politikanët e opozitës nga e majta kanë njoftuar tashmë se do të sfidojnë qeverinë e tij me një mocion mosbesimi.

Në zgjedhjet e korrikut, një bllok i krahut të majtë i quajtur Fronti i Ri Popullor (NFP) fitoi shumicën e vendeve parlamentare nga çdo bllok politik, por jo të mjaftueshme për një shumicë të përgjithshme.

Macron argumentoi se e majta nuk do të ishte në gjendje të mblidhte mjaftueshëm mbështetje për të formuar një qeveri që nuk do të rrëzohej menjëherë në Parlament.

Në vend të kësaj, ai iu drejtua Barnier për të udhëhequr një qeveri që mbështetet kryesisht në mbështetjen parlamentare nga aleatët e Macron, si edhe nga republikanët konservatorë (LR) dhe grupet e qendrës.

‘Nuk ka të ardhme’

Macron po llogariste gjithashtu, në një qëndrim neutral nga e djathta ekstreme — por udhëheqësi i Rassemblement National (RN), Jordan Bardella, nxitoi të dënojë përbërjen e qeverisë së re.

Ai shënoi “një kthim në makronizëm” dhe kështu “nuk kishte asnjë të ardhme”, tha ai të shtunën.

Në anën tjetër të spektrit politik, flamurtari i ekstremit të majtë, Jean-Luc Melenchon, e quajti formacionin e ri “një qeveri e humbësve të zgjedhjeve të përgjithshme”.

Franca, tha ai, duhet “të heqë qafe” qeverinë “sa më shpejt të jetë e mundur”.

Ndër fytyrat e reja në postet kryesore të kabinetit janë Ministri i Jashtëm, Jean-Noel Barrot, një centrist dhe konservatori Bruno Retailleau në Ministrinë e Brendshme, portofoli i të cilit mbulon imigracionin.

Ministri i Mbrojtjes, Sebastien Lecornu, një aleat i ngushtë i Macronit, ka mbajtur detyrën e tij.

Puna e vështirë për të paraqitur një plan buxheti në Parlament muajin e ardhshëm i takon 33-vjeçarit Antoine Armand, ministrit të ri të Financave. Ai ka shërbyer më parë si kreu i komisionit të çështjeve ekonomike të Parlamentit.

Qytetarët ndërkaq kundërshtuan një kabinet, që ata thonë se nuk pasqyron rezultatin e zgjedhjeve parlamentare.

“Unë jam këtu sepse ky rezultat nuk korrespondon me mënyrën se si votuan njerëzit,” tha Violette Bourguignon, 21 vjeçe, duke demonstruar në Paris.

“Jam e shqetësuar dhe e zemëruar. Ç’kuptim ka që të kemi zgjedhje?”, shtroi pyetjen ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.