Macron e quan Ramën “zë të çmuar” në dialogun Kosovë-Serbi

Presidenti francez, Emmanuel Macron, e ka etiketuar si një “zë të çmuar në dialogun mes Kosovës dhe Serbisë” kryeministrin shqiptar, Edi Rama, duke evidentuar rolin konstruktiv që ky i fundit ka luajtur në proces.

Komentin Macron e bëri gjatë një pritje të zhvilluar në nder të kryeministrit Rama në Paris, në palltin presidencial të Elysee-së, ku të dy mbajtën edhe një konferencë për shtyp, të përqendruar në bashkëpunimin dypalësh dhe integrimin e Shqipërisë në Bashkimin Evropian, pa lënë pas rolin e Tiranës në politikat rajonale.

“Franca është e angazhuar për integrimin e Shqipërisë në Bashkimin Evropian. Këtu bëhet fjalë për ta bërë Evropën më të fortë dhe më sovrane në kontekstin e luftës në Ukrainë. Është një premtim paqeje për gjithë rajonin”, theksoi Macron.

Ai vlerësoi maksimalisht rrugëtimin e Shqipërisë drejt integrimit, duke thënë se madje “e admiron avancimin e bërë”.

“Sa e admiroj rrugën që ka bërë vendi juaj, për miqësinë, për ndjenjat shumë të thella evropiane. Do thoja ndoshta edhe më shumë se evropiane. Ne i kushtojmë rendësi kësaj, jeni ju, jemi ne, marr janë të veçanta dhe kjo falë punës së përbashkët”, përmendi.

Duke iu referuar edhe vizitës së tij të mëparshme në Shqipëri, Macron theksoi se lidhjet mes Tiranës dhe Parisit po forcohen dita ditës dhe se Franca është e vendosur për të bërë më shumë për Ballkanin Perëndimor.

Ai po ashtu përshëndeti zërin e fortë të Shqipërisë në rajon dhe po ashtu në arenën ndërkombëtare.

“Kështu ka qenë dy vite kur ju mbanit postin në Këshillin e Sigurimit. Në të gjitha çështjet rajonale është i nevojshme normalizim i marrëdhënieve mes Serbisë dhe Kosovës”, vijoi.

Në mbyllje, presidenti francez bëri me dije se do të formohet një Këshill Shqipëri-Francë për inovacionin.

“Do të nënshkruajmë në marrëveshje ndërqeveritare, në menaxhimin e ujit turizmit të qëndrueshëm dhe inovacionit. Do të kemi një Këshill Francë-Shqipëri për inovacionin”, përmbylli Macron.

Nga ana tjetër, kryeministri Rama e ka falënderuar presidentin francez, Emmanuel Macron, për gjithë angazhimin e këtij të fundit në avancimin e integrimit evropian të Ballkanit Perëndimor.

Gjatë një konference të përbashkët për shtyp me Macronin, Rama vlerësoi rolin e presidentit francez, duke shtuar edhe ngritjen e raporteve mes Shqipërisë dhe Francës në një nivel tjetër.

“Tani kemi një horizont të ri të punës së përbashkët, ku ka nisur investime për njohjen dhe investimin francez për parqet fotovoltaike të rajonit”, përmendi kryeministri.

Ai tha më tej se shkolla 42, po hap dyert falë mbështetjes personale të Macron dhe falë personalitetit vërtet të jashtëzakonshëm të tij.

“Kur Franca mbërrin nuk është çështje parash, është çështje njohjeje kulture. Të kesh më shumë Francë do të thotë të kesh më shumë burime. Jemi pro francez, sepse mendoj se të jesh pro francez do të thotë të jesh etalon i të qenit evropian. Nuk mund të jesh pro Evropë pa qenë pro francez”, vijoi më tej kryeministri.

Teksa, në fund, përmendi edhe një marrëveshje të nënshkruar tashmë mes dy vendeve, sa i takon inovacionit.

“Franca do të bëjë pjesë në të tashmen, si një mbështetje  e prekshme. Vetëm mund të them faleminderit. Në emër të gjithë shqiptarëve. Që të them të drejtën kanë qenë disi skeptik lidhur me Francën para disa vitesh. Por ne kemi një aftësi besnikërie që është unike. Nëse do të keni nevojë një ditë kur jeni në nevojë thërrisni një shqiptar dhe ai do t’ju ndihmojë shumë”, përmbylli.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.